काठमाडौं । आउँदो शनिवारदेखि शुरू हुने नेपाल प्रिमियर लिग (एनपीएल) क्रिकेटको उद्घाटन खेलको सबै टिकट बिक्री भएकाे छ ।

कीर्तिपुरकाे त्रिवि क्रिकेट मैदानमा हुने एनपीएलको उद्घाटनका लागि १० हजार वटा टिकट बिक्री भएको नेपाल क्रिकेट सङ्घ (क्यान) का सचिव छुम्बी लामाले जानकारी दिए । १० हजारमध्ये ८ सय वटा भीआईपीतर्फका र ९ हजार २ सय वटा साधारणतर्फका टिकट बिक्री भएको हाे ।

क्यानले उद्घाटन खेलका लागि साधारणतर्फ ३ सय र भीआईपीतर्फ ७ सय रुपैयाँ टिकट दर तोकेको छ । यो हिसाबले उद्घाटनको दिनका लागि ३३ लाख २० हजार रुपैयाँ बराबरका टिकट बिक्री भएका छन् । अरू खेलका लागि पनि धमाधम टिकट बुकिङ भइरहेका छन् ।

एनपीएलको उद्घाटन खेलमा शनिवार दिउँसो १२ बजे विराटनगर किङ्ग्स र जनकपुर बोल्ट्स खेल्दैछन् ।