काठमाडौं । अमेरिकी पूर्वराष्ट्रपति डोनाल्ड ट्रम्पले क्यानडाले प्यालेस्टाइन राज्यलाई मान्यता दिने निर्णयपछि दुई देशबीचको व्यापार सम्बन्धमा तनाव उत्पन्न हुन सक्ने चेतावनी दिएका छन्।

ट्रम्पले आफ्नो सामाजिक सञ्जाल ट्रुथ सोसल मा लेखेका छन्, “वाह ! क्यानडाले भर्खरै प्यालेस्टाइनको राज्यलाई समर्थन गर्ने घोषणा गरेको छ । यसले हामीलाई उनीहरूसँग व्यापार सम्झौता गर्न धेरै कठिन बनाउनेछ । ओ क्यानडा !!!”

यदि तत्काल व्यापार सम्झौता नभएमा, क्यानडाबाट अमेरिका पठाइने अधिकांश वस्तुहरूमा ३५ प्रतिशतसम्म भन्सार शुल्क लाग्ने ट्रम्प पक्षले चेतावनी दिएको छ।

क्यानडाको यो निर्णय बेलायत र फ्रान्सले गरेका समान घोषणाहरूको पछिल्लो कडी हो। गाजा क्षेत्रमा खाद्य संकट गहिरिँदै गएको सन्दर्भमा क्यानडाले प्यालेस्टाइनलाई मान्यता दिने तयारी गरेको हो।

बुधबार, हमासद्वारा सञ्चालित गाजाको स्वास्थ्य मन्त्रालयले कुपोषणका कारण सातजनाको ज्यान गएको जनाएको बीबीसीले उल्लेख गरेको छ।

ओटावामा क्यानडाका प्रधानमन्त्री मार्क कर्नीले सेप्टेम्बर महिनाभित्र प्यालेस्टाइन राज्यलाई औपचारिक मान्यता दिने योजना रहेको बताएका छन्। यद्यपि, उनले वेस्ट बैंकमा रहेका प्यालेस्टाइनी प्राधिकरणले आवश्यक सुधारहरू गर्नुपर्ने शर्त राखेका छन्। हमासले भविष्यमा कुनै भूमिका नखेल्ने कुरामा पनि उनले जोड दिएका छन्।

यसबीच, प्यालेस्टाइनी प्राधिकरणका राष्ट्रपति महमूद अब्बासले क्यानडाको निर्णयलाई “ऐतिहासिक” भन्दै स्वागत गरेका छन्।