वासिङ्टन डीसी । अमेरिकी राष्ट्रपति डोनाल्ड ट्रम्पको प्रशासनले क्यालिफोर्निया विश्वविद्यालय, लस एन्जलस (यूसीएलए)लाई दिँदै आएको ५८ करोड ४० लाख डलर बराबरको सङ्घीय अनुसन्धान अनुदान निलम्बन गरेको छ ।

रोकिएको यो रकम पहिला अनुमान गरिएभन्दा लगभग दोब्बर हो । यूसीएलएका कुलपति जुलियो फ्र्याङ्कले बुधबार यो जानकारी दिएका हुन् । जातीय भेदभाव र यहूदी विरोधी वातावरण बनाएको आरोपमा सरकारी विश्वविद्यालयको कोष यसरी रोकिएको यो पहिलो पटक हो । निजी विश्वविद्यालयहरूमा पहिले नै यस्ता कदमहरू चालिएका थिए ।

यूसीएलएले यहूदी र इजरायली विद्यार्थीहरू विरुद्ध भेदभाव र शत्रुतापूर्ण वातावरण बनाउन अनुमति दिएको आरोप ट्रम्प प्रशासनको छ । यूसीएलएले १९६४ को नागरिक अधिकार ऐन र संविधानको १४ औँ संशोधनको उल्लङ्घन गरेको अमेरिकी न्याय मन्त्रालयको नागरिक अधिकार डिभिजनले आफ्नो जाँचमा फेला पारेको बताइएको छ । २०२४ मा प्यालेस्टाइन समर्थक प्रदर्शनको क्रममा, केही यहूदी विद्यार्थी र प्राध्यापकहरूले आफूहरूलाई कक्षामा उपस्थित हुनबाट रोक लगाइएको र निशाना बनाइएको गुनासो गरेका थिए ।

यूसीएलएले तीन यहूदी विद्यार्थी र एक प्राध्यापकसँगको ६० लाख डलर तिरेर यो मामिला राफसाफ गरेको थियो । विश्वविद्यालयले अब यहूदी विरोधीविरुद्ध काम गर्ने आठ संस्थाहरूलाई २३ लाख डलर दिनेछ । विश्वविद्यालयले क्याम्पस र सामुदायिक सुरक्षा कार्यालय नामक नयाँ विभाग पनि सुरु गरेको छ, जसले क्याम्पसमा सुरक्षा र प्रदर्शन नियन्त्रणको हेरचाह गर्नेछ ।

यी कोषहरू स्थायी रूपमा रोकिए भने यसले विश्वविद्यालयमा हुने अनुसन्धान प्रभावित हुने र यो यूसीएलए र सम्पूर्ण देशको लागि विनाशकारी हुने फ्र्याङ्कले भनेका छन् । विश्वविद्यालयले यो पैसा राष्ट्रिय विज्ञान प्रतिष्ठान, राष्ट्रिय स्वास्थ्य संस्थान र ऊर्जा विभागबाट पाउँदै आएको थियो ।

क्यालिफोर्निया विश्वविद्यालयका नयाँ अध्यक्ष जेम्स बी. मिलिकेनले पनि यो निर्णयको आलोचना गरेका छन् । गत हप्ता यस्तै आरोपमा कोलम्बिया विश्वविद्यालयले २० करोड डलर तिरेर मामिला राफसाफ गरेको थियो । यसपछि प्रशासनले विश्वविद्यालयलाई ४० करोड डलर कोष फिर्ता गरेको थियो । ट्रम्प प्रशासनले अब यो मोडेल अन्य विश्वविद्यालयहरूमा लागू गर्ने योजना बनाइरहेको छ ।