वासिङ्टन । अमेरिकी राष्ट्रपति डोनाल्ड ट्रम्पले अजरबैजान र अर्मेनियाका नेतालाई शुक्रबार स्वागत गर्ने भएका छन् । अर्मेनियाका प्रधानमन्त्री निकोल पाशिन्यान र अजरबैजानका राष्ट्रपति इल्हाम अलियेभ ह्वाइट हाउसमा हुने ‘शान्ति सम्झौता हस्ताक्षर समारोह’मा सहभागी हुनेछन् ।

कम्बोडियाका प्रधानमन्त्री हुन मानेटले ट्रम्पलाई नोबेल शान्ति पुरस्कारका लागि सिफारिस गरेको घोषणा गरेको एक दिनपछि अमेरिकाले पछिल्लो कूटनीतिक पहलबारे जानकारी दिएको हो ।

ट्रम्पले पटक–पटक आफ्नो कूटनीतिक प्रयासको प्रशंसा गर्दै आफू यो पुरस्कारको हकदार भएको बताउँदै आएका छन् भने जारी रुस–युक्रेन युद्ध र इजरायलको आक्रमणका क्रममा गाजामा देखिएको भोकमरीप्रति पनि निराशा व्यक्त गरेका छन् ।

अर्मेनिया र अजरबैजानका लागि पनि शान्ति कायम हुन सकेको छैन । दशकौँसम्म शत्रु बनेका दुई पूर्व सोभियत गणतन्त्रले विवादित काराबाख क्षेत्रलाई लिएर दुई पटक युद्ध गरे, जसलाई अजरबैजानले सन् २०२३ को ‘संक्षिप्त तर निर्णायक’ आक्रमणमा अर्मेनियाली सेनाबाट फिर्ता लिएको थियो । गत महिना संयुक्त अरब इमिरेट्स (युएई) लगायत देशले दुई देशबिचको शान्तिपूर्ण समाधानका लागि वार्ता गरेका थिए, तर कुनै सफलता हासिल हुन सकेको छैन ।

ट्रम्पले लेखेका छन्, “यी दुई राष्ट्रबिच वर्षौंदेखि युद्ध चलिरहेको छ, जसका कारण हजारौँ मानिसको मृत्यु भएको छ ।” “धेरै नेताहरूले युद्ध अन्त्य गर्ने प्रयास गरेका छन्, तर अहिलेसम्म कुनै सफलता प्राप्त भएको छैन, ‘ट्रम्प’ लाई धन्यवाद । मेरो प्रशासनले केही समयदेखि दुवै पक्षसँग काम गरिरहेको छ,” उहाँ (ट्रम्प)ले भने, “यी साहसी नेताहरूले सही काम गरेकोमा मलाई गर्व छ ।”

“शुक्रबार अर्मेनिया, अजरबैजान, संयुक्त राज्य अमेरिका र विश्वका लागि ऐतिहासिक दिन हुनेछ,” ट्रम्पले भने । अर्बपति व्यवसायी ट्रम्पले वासिङ्टनले दुवै देशसँग द्विपक्षीय सम्झौतामा हस्ताक्षर गर्ने र आर्थिक अवसरलाई एकसाथ अगाडि बढाउने बताएका छन् ।