काठमाडौं। नेपाल विद्युत् प्राधिकरणले आर्थिक वर्ष २०८१/८२ मा एक खर्ब ३८ अर्ब ८७ करोड रुपैयाँ आम्दानी गरेको छ।

प्राधिकरणले केवल विद्युत् बिक्रीबाटै एक खर्ब २५ अर्ब २७ करोड ७० लाख रुपैयाँ आर्जन गरेको हो। यसमध्ये १७ अर्ब ४७ करोड १० लाख रुपैयाँ भारततर्फ निर्यात गरिएको विद्युत् बिक्रीबाट आएको प्राधिकरणले जनाएको छ। यो अघिल्लो आर्थिक वर्ष २०८०/८१ को तुलनामा ८.४६ प्रतिशतले वृद्धि हो।

उता, सोही अवधिमा प्राधिकरणको खर्च एक खर्ब २९ अर्ब ८१ करोड पुगेको छ। संचालन खर्च मात्रै १०.१५ प्रतिशतले बढ्दै ९७ अर्ब ७८ करोड ७० लाख पुगेको छ।

विद्युत् खरिदतर्फको खर्च ११.७३ प्रतिशत बढेर ७७ अर्ब १० करोड पुगेको छ भने उत्पादनमा दुई अर्ब सात करोड, प्रसारणमा तीन अर्ब २४ करोड, वितरणमा १२ अर्ब २२ करोड र रोयल्टीतर्फ एक अर्ब ८४ करोड खर्च भएको छ। व्याज, ह्रासकट्टी र विनिमय नोक्सानीसमेत जोड्दा कुल खर्च एक खर्ब २९ अर्ब ८१ करोड पुगेको हो।

आर्थिक वर्ष २०८१/८२ मा कर अघिको नाफा नौ अर्ब ६ करोड ७० लाख रुपैयाँ मात्र कायम भएको छ, जुन अघिल्लो वर्षको तुलनामा ३७.३२ प्रतिशत कम हो।

यद्यपि, प्राधिकरणको कुल सम्पत्ति भने ६.२ प्रतिशतले बढेर ६ खर्ब ८४ अर्ब ९१ करोड पुगेको छ।