वासिङ्टन डीसी । अमेरिकाको मिनेसोटा राज्यमा संघीय सीमा सुरक्षा अधिकारीद्वारा एक व्यक्तिको गोली हानी हत्या भएपछि गृह सुरक्षा मन्त्रालय (डीएचएस)को बजेटलाई लिएर अमेरिकी सिनेटमा राजनीतिक टकराव चर्किएको छ ।

सिनेटका अल्पमतक नेता चक शुमरले मन्त्रालयको बजेट समावेश भएको खर्च विधेयकलाई डेमोक्र्याटहरूले समर्थन नगर्ने घोषणा गरेपछि आंशिक सरकारी शटडाउनको सम्भावना बढेको छ ।

शुमरले सामाजिक सञ्जालमा लेख्दै भने, ‘डेमोक्र्याटहरूले डीएचएस बजेटमा सुधारको माग गरे तर रिपब्लिकनहरूले राष्ट्रपति डोनाल्ड ट्रम्पको दबाबविरुद्ध उभिन मानेनन् । यसैले म यस विधेयकको विपक्षमा मतदान गर्नेछु ।’ डीएचएस अन्तर्गतको इमिग्रेसन एन्ड कस्टम्स इन्फोर्समेन्ट (आईसीई) का गतिविधिमा नियन्त्रण गर्न बजेट अपर्याप्त रहेको आरोप पनि उनले लगाए ।

शुक्रबार मध्यरातसम्म सिनेटले खर्च विधेयक पारित नगरे अमेरिकामा सरकारी कामकाज आंशिक रूपमा बन्द हुन सक्छ । विधेयकलाई अघि बढाउन ६० मत आवश्यक छ । ५३ सिट भएको रिपब्लिकन बहुमतलाई कम्तीमा आठ डेमोक्र्याटको समर्थन चाहिन्छ । रिपब्लिकनका सिनेटर र्‍यान्ड पलले पनि विपक्षमा मतदान गर्ने सम्भावना छ ।

मिनेसोटामा यसै महिना संघीय अधिकारीद्वारा भएका तीनवटा गोलीकाण्डपछि डीएचएस र आईसीईको भूमिकामाथि प्रश्न उठिरहेका छन् । यही सन्दर्भमा डेमोक्र्याटहरूले कडा निगरानी र सुधारबिना डीएचएसलाई बजेट दिन नसकिने अडान लिएका छन् ।