सर्लाही । सर्लाहीको गोडैता नगरपालिका-५ रामवनस्थित एक आँपको रुखमा झुण्डिएको अवस्थामा दुई किशोरीको शव फेला परेको छ।

सर्लाही प्रहरीका अनुसार रामनगर गाउँपालिका-६ निवासी विनोद दासकी करिब १७ वर्षीया छोरी संगीता दास र सोही स्थानका ईन्द्रजित दासकी करिब १८ वर्षीया छोरी नागिना दास मृत फेला परेका हुन्। उनीहरूको शव आँपको रुखको एउटै हाँगामा प्लास्टिकको डोरीको पासो लगाइएको अवस्थामा भेटिएको सर्लाही प्रहरी प्रवक्ता एवं डिएसपी सरोज राईले जानकारी दिएका छन्।

घटनाबारे बुधबार साँझ करिब ६ बजेतिर सूचना प्राप्त हुनासाथ इलाका प्रहरी कार्यालय हरकठवाबाट प्रहरी नायब निरीक्षक पदमबहादुर खड्काको कमाण्डमा चार जनाको टोली घटनास्थलतर्फ खटिएको प्रहरीले जनाएको छ। त्यसैगरी जिल्ला प्रहरी कार्यालय सर्लाहीबाट प्रहरी निरीक्षक बिन्देश्वरप्रसाद यादवको नेतृत्वमा फरेन्सिक टोलीसहित १० जना प्रहरीसमेत परिचालन गरिएको छ।

प्रहरीका अनुसार प्रारम्भिक अनुसन्धानका क्रममा दुवै किशोरी झुण्डिएको अवस्थामा मृत फेला परेका हुन्। घटनाको कारण भने खुल्न बाँकी रहेको र यस सम्बन्धमा थप अनुसन्धान भइरहेको प्रहरीले जनाएको छ।