काठमाडौँ । नेपाली काँग्रेसले संविधान संशोधनसम्बन्धी सुझाव संकलन र प्रारम्भिक अध्ययनका लागि गठन गरेको कार्यदलले मंगलबारदेखि औपचारिक रूपमा काम सुरु गरेको छ ।

उपसभापति पुष्पा भुसालको नेतृत्वमा १७ सदस्यीय समिति गठन गरिएको थियो, जसको पहिलो बैठक बसेर कार्य प्रारम्भ गरिएको हो । बैठकमा पार्टी सभापति गगन थापा, महामन्त्री प्रदीप पौडेल तथा सहमहामन्त्रीद्वय उदयशमशेर राणा र योगेन्द्र चौधरीको सहभागिता रहेको थियो ।

बैठकमा सभापति थापाले संविधान संशोधनको औचित्य, यसको दायरा तथा समितिको जिम्मेवारीबारे धारणा प्रस्तुत गरेका थिए । उनका अनुसार संविधान जारी भएको एक दशक नाघिसकेको र कार्यान्वयनका क्रममा देखिएका अनुभवका आधारमा केही प्रावधान परिमार्जन आवश्यक भएको निष्कर्ष निकालिएको छ ।

थापाले लोकतान्त्रिक प्रणाली सुदृढीकरण, नागरिक अधिकार संरक्षण, राष्ट्रिय हित र समृद्धिलाई केन्द्रमा राखेर छलफल अघि बढाउन समितिलाई आग्रह गरेका थिए ।

समितिका सदस्य सचिव राजु कटुवालका अनुसार बैठकमा संविधानका प्रावधानहरूको विस्तृत अध्ययन गर्दै संशोधनका लागि प्रारम्भिक मस्यौदा तयार पार्ने र विज्ञ, सरोकारवाला तथा सर्वसाधारणसँग छलफल गर्ने कार्ययोजना प्रस्तुत गरिएको छ ।

यसैबीच, सरकार पक्षबाट शुक्रबारभित्र काँग्रेसले संविधान संशोधनसम्बन्धी बहस पत्र तयार गर्न प्रतिनिधिको नाम पठाउन आग्रह गरिएको जानकारी पनि बैठकमा दिइएको थियो ।

कार्यदलमा वरिष्ठ अधिवक्ताहरू राधेश्याम अधिकारी, हरिहर दाहाल, प्रेमबहादुर खड्का, उपेन्द्रकेशरी न्यौपाने, शेरबहादुर केसी, यदुनाथ खनाल, गोपालकृष्ण घिमिरे, योगेन्द्रबहादुर अधिकारी, दिनेश त्रिपाठी, सिताराम केसी, ललितबहादुर बस्नेत तथा अधिवक्ताहरू रनबहादुर थेवे, शर्मिला श्रेष्ठ, झलमाया बिक र निरज गुप्ता सदस्य रहेका छन् ।