काठमाडौँ । नेपाली काँग्रेसले आफ्ना नेता, कार्यकर्ता र सदस्यहरूलाई सामाजिक एकता तथा सद्भावमा असर पुग्ने कुनै पनि गतिविधिमा संलग्न नहुन निर्देशन दिएको छ ।

पार्टी प्रवक्ता देवराज चालिसेले जारी गरेको विज्ञप्तिमार्फत काँग्रेसले संवेदनशील परिस्थितिमा संयमित भूमिका निर्वाह गर्न आफ्ना सबै तहका नेता तथा कार्यकर्तालाई आग्रह गरेको हो ।

काँग्रेसले पीडित परिवारलाई सहयोग गर्न, घाइतेको उपचार तथा आवश्यक सहयोगमा जुट्न र समाजमा आपसी सद्भाव कायम राख्ने कार्यमा सक्रिय हुन पार्टी पंक्तिलाई आग्रह गरेको छ ।

विज्ञप्तिमा पार्टीको निर्देशन विपरीत सामाजिक वातावरण बिगार्ने गतिविधिमा संलग्न भएको पाइएमा विधानअनुसार कारबाही गरिने उल्लेख गरिएको छ ।

काँग्रेसले वर्तमान अवस्थामा सामाजिक सहिष्णुता र सद्भाव संरक्षण गर्नु सबैको साझा दायित्व भएको भन्दै आफ्ना सदस्यहरूलाई जिम्मेवार र संयमित व्यवहार गर्न आग्रह गरेको छ ।