काठमाडौँ । त्रिभुवन विश्वविद्यालय अन्तर्गत व्यवस्थापन संकायको एमबीएस प्रथम सेमेस्टरको परीक्षासँग सम्बन्धित प्रश्नपत्र परीक्षा सुरु हुनुअघि तथा परीक्षा सञ्चालनकै क्रममा बाहिरिएको घटनामा सात जनाविरुद्ध कानुनी कारबाही अघि बढाइएको छ।

सरकारी वकिलको कार्यालयले शिक्षा ऐन, २०२८ बमोजिम कसुर गरेको अभियोगमा सोमबार काठमाडौँ जिल्ला अदालतमा अभियोग पत्र दर्ता गरेको हो। अदालतका सूचना अधिकारी शिव खतिवडाका अनुसार अभियोग पत्र दर्तापछि प्रतिवादीहरूको बयान लिने प्रक्रिया जारी छ।

प्रहरीले गरेको अनुसन्धानबाट शिक्षक सन्दीप सिंहले ‘सुलभ’ सर नाम प्रयोग गरी ह्वाट्सएप समूह सञ्चालन गरेको र सोही माध्यमबाट परीक्षाको प्रश्नपत्र बाहिर पुर्‍याइएको निष्कर्ष निकालेको जनाइएको छ।

प्रश्नपत्र परीक्षा अगावै सार्वजनिक हुनुका साथै परीक्षा सञ्चालनका क्रममा समेत बाहिरिएको घटनालाई अनुसन्धानपछि कानुनी प्रक्रियामा लगिएको हो।