काठमाडौँ । रसुवामा आएको बाढीबाट प्रभावित नागरिकको खोज, उद्धार र उपचारमा नेपाली सेना स्थल तथा हवाई दुवै माध्यमबाट परिचालित भएको छ।

सैनिक टोलीले प्रभावित तथा घाइतेलाई घटनास्थलबाट स्ट्रेचरमा उद्धार गर्ने, प्राथमिक उपचार गर्ने र थप उपचार तथा सुरक्षित स्थानान्तरणका लागि हेलिकोप्टरसम्म पुर्‍याउने काम गरिरहेको हो ।

उद्धार गरिएका व्यक्तिलाई सैनिक स्वास्थ्यकर्मीले घटनास्थलमै आवश्यक प्राथमिक उपचारसमेत गरिरहेका छन्। अवस्था र आवश्यकताका आधारमा उनीहरूलाई हेलिकोप्टरमार्फत सुरक्षित स्थान तथा उपचार केन्द्रतर्फ लगिएको नेपाली सेनाले जनाएको छ।

यसअघि नेपाली सेनाका प्रवक्ताले प्रशासनसँगको कुराकानीमा टिमुरे, स्याफ्रुबेसी, मैलुङ र त्रिशूली क्षेत्रमा हवाई उद्धार केन्द्रित गरिएको तथा धुन्चे र त्रिशूलीबाट सैनिक जनशक्ति परिचालन गरिएको बताएका थिए।

पछिल्लो विवरणअनुसार बाढी प्रभावित क्षेत्रमा नेपाली सेनाका साथै अन्य सुरक्षा निकाय र उद्धार संयन्त्र परिचालित छन्। प्रभावित क्षेत्रको अवस्था र पहुँचअनुसार स्थल तथा हवाई माध्यमबाट खोज तथा उद्धारलाई निरन्तरता दिइएको छ।

प्रधानमन्त्री वालेन्द्र शाहको निर्देशनपछि तीनै सुरक्षा निकाय परिचालन गरिएको छ भने जोखिमयुक्त तल्लो तटीय क्षेत्रका बासिन्दालाई सुरक्षित स्थानमा सार्ने, घाइतेको उपचार गर्ने र आवश्यक राहत तथा उद्धार सामग्री परिचालन गर्ने कामसमेत भइरहेको छ।