काठमाडौं । नेकपा एकीकृत समाजवादीका अध्यक्ष माधवकुमार नेपालले नेकपा एमाले नेतृत्वको चुनावी गठबन्धन अपवित्र भएको आरोप लगाएका छन् ।

मंगलबार ललितपुरमा गठबन्धन दलका कार्यकर्ताको संयुक्त भेलालाई सम्बोधन गर्दै उनले एमाले नेतृत्वको अपवित्र चुनावी गठबन्धनलाई परास्त गर्नुपर्ने विचार व्यक्त गरे । उनले आफ्नो गठबन्धन संविधान जोगाउनको लागि भएको दाबी गरे ।

‘हामी सहकार्य गर्न सक्छौँ । धेरै ठाउँमा जित्न सक्छौँ । गठबन्धनको बारेमा विपक्षीले भ्रम फैलाउन थालेका छन्’, उनले भने, ‘विपक्षीको अनेक कुरालाई खण्डन गर्नुपर्छ । गठबन्धन प्राकृतिक हो कि अप्राकृतिक भनेर प्रश्न गरेमा हामीले काउण्टर दिनुपर्छ । हामीले गरेको गठबन्धन पवित्र हो । विपक्षी गठबन्धन अपवित्र हो ।’

ओलीले संविधान मास्ने कदम गरेपछि गणतन्त्र र संविधान जोगाउन आफूहरूले गठबन्धन गरेको नेपालको भनाइ थियो । उनले भने, ‘दुई पटक संविधान कुल्चिने काम भएको थियो । अधिकार नाघेर तत्कालीन प्रधानमन्त्रीले कदम चाले । हामी एकै ठाउँमा उभिएर संविधान र लोकतन्त्र जोगायौं ।’