काठमाडौं । नेपाली राष्ट्रिय क्रिकेट टोलिका युवा ओपनर ब्याट्सम्यान कुशल भुर्तेल टी–२० क्रिकेटमा सबैभन्दा छिटो ५०० रन पूरा गर्ने खेलाडी बनेका छन् । त्रिवि क्रिकेट मैदानमा सोमबार पपुवा न्यू गिनी (पीएनजी) विरुद्धको खेलबाट भुर्तेलले यो कीर्तिमान बनाएका हुन् ।

पीएनजीविरुद्ध २० रन बनाएर आउट हुनुअघि भुर्तेलले ५०० रन पूरा गरेका हुन् । उनले मात्र १२ खेलमा उक्त कीर्तिमान पूरा गरे । कुशलको टी–२० अन्तर्राष्ट्रिय रन ५१८ पुगेको छ । यस अघि १३ खेलमा ५०० रन बनाएका विश्व प्रशिद्ध भारतीय ब्याटर के एल राहुलको नाममा उक्त कीर्तिमान रहेको थियो ।

डेब्यू शृंखलामै कुशलले नेदरल्याण्ड्सविरुद्ध ३ तथा मलेसियाविरुद्ध १ अर्धशतक बनाएका थिए । एक वर्षको अवधिमा कुशलले टी–२० मा नियमित उत्कृष्ठ प्रदर्शन गरिरहेका छन् ।