काठमाडौं । आसन्न स्थानीय तह निर्वाचनमा नेपाली कांग्रेसले तीन महानगरपालिकामा मात्रै मेयरको उम्मेद्वार उठाउने भएकाे छ । पाँच दलीय गठबन्धनबीच भागबन्डा मिलाउँदा कांग्रेसको भागमा काठमाडौं, ललितपुर र विराटनगर महानगरपालिका परेको हो । जहाँ यसले मेयरका लागि मात्र उम्मेदवारी दिन पाउनेछ ।

त्यस्तै तीन उपमेयरका लागि उम्मेदवारी दिन पाउनेछ । वीरगञ्ज, पोखरा र भरतपुर महानगरपालिकामा कांग्रेसको भागमा उपमेयर परेको छ । यस हिसाबले ६ वटा महानगरमा कांग्रेसले तीन महानगरमा मेयर र तीन महानगरमा उपमेयरको सिट पाएको हो । जबकि २०७४ सालको स्थानीय तह निर्वाचनमा कांग्रेसले ललितपुर र विराटनगर महानगरपालिकामा मेयर र उपमेयर दुबैमा जितेको थियो । त्यस्तै पोखराबाहेक सबै महानगरपालिकामा उपमेयर जितेको थियो ।

२०७४ को निर्वाचनमा महानगरमा मेयर र उपमेयर गरी सातजना जितेको कांग्रेसले २०७९ को स्थानीय तह निर्वाचनका लागि मेयर र उपमेयर गरी ६ सिट पाएको छ । त्यसमा पनि सबै सिटमा जित हात पार्छ भनेर अहिले नै भन्न सकिने अवस्था छैन । जति सिट पाएको छ ती सबैमा जिते पनि कांग्रेस महानगरमा अघिल्लो चुनावको तुलनामा कम सिटमा जित्नेछ ।

कांग्रेसले २०७४ सालको स्थानीय तह निर्वाचनमा ललितपुर महानगरपालिका मेयर र उपमेयर दुबैमा जितेको थियो । मेयरमा चिरिबाबु महर्जनले २४ हजार ६ सय ४२ मत लिएर जितेका थिए । एमालेका उम्मेदवार हरिकृष्ण व्यन्जनकार ३२६ मतान्तरले पराजित भएका थिए । उनले २४ हजार ३१६ मत पाएका थिए ।

उपमेयरमा पनि कांग्रेसकै गीता सत्याल १९ हजार ८१९ मत पाएर विजयी भएकी थिइन् । साझा पार्टीकी शोभा शाक्य ५ हजार ५७९ मतान्तरले पराजित भएकी थिइन् । उनले १४ हजार २४० मत ल्याएकी थिइन् । ललितपुरमा २०७४ सालको निर्वाचनमा एक लाख १२ हजार ९२३ मतदाता थिए । अहिले एक लाख २२ हजार ८९० मतदाता छन् ।

काठमाडौं महानगरपालिकामा २०७४ सालका निर्वाचनमा एमालेका उम्मेदवार विद्यासुन्दर शाक्य विजयी भएका थिए । उनले ६४ हजार ९१३ मत पाएका थिए । कांग्रेस उम्मेदवार राजुराज जोशीले ४५ हजार २६९ मत पाएका थिए । विद्यासुन्दरले १९ हजार बढी मतान्तरले जोशीलाई पराजित गरेका थिए । उपमेयरमा भने कांग्रेसकी हरिप्रभा खड्गी विजयी भएकी थिइन् । उनले ५८ हजार ९५२ मत पाउँदा उनका प्रतिद्वन्द्वी राप्रपाका राजाराम श्रेष्ठले ३४ हजार ८५४ मत पाएका थिए । काठमाडौं महानगरपालिकामा २०७४ सालमा दुई लाख ७९ हजार ३०९ मतदाता थिए । अहिले तीन लाख २४२ मतदाता छन् ।

त्यस्तै कांग्रेसले मेयरमा दाबी गरेको अर्को महानगर हो, विराटनगर । विराटनगर महानगरपालिकामा मेयर र उपमेयर दुवै कांग्रेसले जितेको थियो । मेयरमा कांग्रेसका भीम पराजुली र उपमेयरमा इन्दिरा कार्की (इन्दु) विजयी भएका थिए । पराजुलीले २३ हजार ३१ मत पाएका थिए भने उनका प्रतिस्पर्धी एमालेका विनोद ढकालले १७ हजार ३२१ मत पाएका थिए ।

उपमेयरमा कार्की २० हजार १४६ मत पाएर विजयी भएकी थिइन् । उनका प्रतिस्पर्धी माओवादी केन्द्रकी नमिता न्यौपानेले ११ हजार ५२४ मत पाएकी थिइन् । २०७९ को निर्वाचनका लागि विराटनरगमा कांग्रेसले मेयरको लागि मात्र सिट पाएका छ । उपमेयर भने जसपाले पाएको छ । २०७४ को निर्वाचनमा एक लाख १३ हजार ७६१ मतदाता थिए भने अहिले एक लाख ३३ हजार १४२ मतदाता छन् ।

२०७४ को निर्वाचनमा मेयर र उपमेयर एमाले विजयी भएको पोखरा महानगरपालिकामा यसपालि कांग्रेसको भागमा उपमेयर परेको छ । एकीकृत समाजवादीको भागमा मेयर परेको छ । जसले गर्दा त्यहाँ अहिले पनि विवाद चलिरहेको छ । कांग्रेस नेता कार्यकर्ताहरूले पार्टी कार्यालयमा तालाबन्दी नै गरेका छन् ।

वीरगञ्ज महानगरपालिकाको उपमेयर कांग्रेसको भागमा परेको छ । २०७४ सालको निर्वाचनमा कांग्रेसकै शान्ति कार्की १९ हजार ६०० मत पाएर विजयी भएकी थिइन् । मेयरमा भने तत्कालीन संघीय समाजवादी फोरम नेपालका विजयकुमार सरावगी विजयी भएका थिए । उनी अहिले एमाले प्रवेश गरेका छन् । एमालेको तर्फबाट उनले नै टिकट पाउने प्रबल सम्भावना छ । सत्तारूढ गठबन्धनबाट भने जसपाको भागमा मेयरको सिट परेको छ ।

महानगरमा घाटा, उपमहानगरमा फाइदै फाइदा

११ वटा उपमहानगरपालिकाको भागबन्डा भने टुंगिन सकेको छैन ।नेपाली कांग्रेस, माओवादी केन्द्र, एकीकृत समाजवादी, जसपा र राष्ट्रिय जनमोर्चाबीच उपमहानगरको भागबन्डा मिल्न सकेको छैन । त्यसका लागि पाँचदलीय गठबन्धनको बैठक बसिरहेको छ । दलहरू आ-आफ्नै अडान कायम राखेपछि भागबन्डा मिल्न नसकेको हो ।

प्रस्तावित खाकाअनुसार ६ वटा उपमहानगरको मेयर कांग्रेसको भागमा परेको छ । त्यस्तै तीन उपमेयर कांग्रेसको भागमा परेको छ भने जनकपुर र नेपालगञ्ज उपमहानगरको भागबन्डा टुंगिन बाँकी छ । २०७४ सालको निर्वाचनमा सुरुमा कांग्रेसले दुईवटा उपमहानगरमा मात्र मेयर जितेको थियो । तीन उपमेयरमा विजयी भएको थियो । पछि उपनिर्वाचनमा कांग्रेसले धरानकाे मेयर पनि जितेकाे थियाे । २०७४ सालको निर्वाचनमा कांग्रेस धनगढी र कलैया उपमहानगरको मेयरमा विजयी भएको थियो । धनगढी, नेपालगञ्ज र कलैयामा उपमेयर जितेको थियो । धनगढी र कलैया कांग्रेसले मेयर र उपमेयर दुवै पदमा जितेको थियो ।