काठमाडौं । लगातार दोस्रो पटक घरेलु मैदानमा आयोजना हुन लागेकाे महिला साफ च्याम्पियनसिप-२०२२ को लागि यतिबेला नेपाली टिम प्रशिक्षणमा व्यस्त छ । उपाधि जित्ने जिम्मेवारीसहित मुख्य प्रशिक्षकमा कुमार थापालाई अखिल नेपाल फुटबल संघ (एन्फा)ले नियुक्त गरेकाे छ । उनै थापा अहिले ५८ महिला खेलाडीलाई प्रारम्भिक चरणको प्रशिक्षण गराइरहेका छन् । 

प्रशिक्षणमा सहभागी ५८ खेलाडीलाई थापाले अन्तिम २३ मा झार्ने छन् । जुन खेलाडीले १३ देखि २५ भदौसम्म दशरथ रंगशालामा हुने साफ च्याम्पियनसिपमा नेपाललाई उपाधि जिताउन हरस्भव प्रयास गर्नेछन् । ‘एन्फाले मलाई दोस्रो पटक मौका दिएको छ । कसरी सफलता दिलाउने त्यो चुनौती छ । हामीसँग जे छ, त्यसमा सतप्रतिशत दिएर सफलता प्राप्त गर्छाैं भन्ने लागेको छ । टिममा लिग खेलेका, एसियन गेम प्रशिक्षण गरिसकेका खेलाडी छन् । हामी घरमै उपाधि राख्ने प्रयास गर्नेछौं,’ थापाले भने ।  

हुन त थापाले पहिलो पटक महिला टिम हेरेका हैनन् । उनकै प्रशिक्षणमा नेपाल भारतमा आयोजना भएको चौथो संस्करणमा सहभागी भएको थियो । तर, टोली सेमिफाइनबाट अगाडि बढ्न सकेन । हालसम्म भएका पाँच प्रतियोगितामध्ये नेपाल चार पटक फाइनलमा पुगेको छ । सन् २०१६ मा थापानै प्रशिक्षक रहेकाे बेला टिम सेमिफाइनलबाट बाहिरिएकाे थियो । त्यो पनि सदावहार प्रतिद्वन्दी भारतसँग । 

थापा आफै महिला टिममा पुनर्जन्म पाएको र यो नै प्रमाणित गर्ने समय रहेको बताउँछन् । ‘अघिल्लो पटक म असफल रहे । मैले पुनर्जन्म पाएको छु । यो भनेको मेरो लागि प्रमाणित गर्ने अवसर हो,’ विभागीय टोली एपिएफ फुटबल क्लबका पूर्वखेलाडी र जागिरे दुबै रहेका थापा भन्छन् । 

थापासँग यसपटक कप्तान रेणुका नगरकोटे रहने छैनन् । यता, रिकवरी हुँदै  गरेकी ‘गोल मेसिन’ सावित्रा भण्डारी (साम्बा) हुनु सुखद् पक्ष हो । यस्तै, युवा खेलाडी सरु लिम्बू, मञ्जलीकुमारी योञ्जन, प्रीति राई, सविता रानामगर, दीपा राई, गीता राना, एन्जिला तुम्बाप्पो सुब्बा, पुनम जर्घामगर, हिराकुमारी भुजेललगायत खेलाडीले लिगमा उत्कृष्ट प्रदर्शन गर्नु र प्रशिक्षणमा समेत राम्रो प्रदर्शन दिनु सकारात्मक देखिएको छ । 

थापा यस पटक समेत सधैँ झै भारत नै नेपालको तगारो बन्ने र भारतलाई पराजित गर्न घरेलु दर्शक र खेलाडीको ‘इख’ नै ‘ब्रम्हास्त्र’ भएको बताउँछन् । 

‘खेलाडीमा पनि १३औं साग र साफ च्याम्पियनसिप (विराटनगरमा भएको)दुई पटक हारेको पीडा छ । मसँग उपाधि नै जित्न भनेर हान्ने त्यस्तो ब्रम्हास्त्र नै छैन । खेलाडी सधैँ खेल्ने यिनै हुन् । यस पटक घरेलु दर्शक र खेलाडीमा भारतलाई हराउने इख छ । हामी आत्माविश्वासी छौं’, थापाको विश्वास छ । 

दोस्रो पटक नेपालमा आयोजना हुन लागेको साफ च्याम्पियनसिपको उद्घाटन खेलमा नेपालले साझ ५ बजे भुटानसँग खेल्दै प्रतियोगिताको सुरुवात गर्नेछ । यस्तै, दोस्रो खेल १९ भदौमा श्रीलंकासँग रहेको छ । समूहको शीर्ष दुई टोली सेमिफाइनल पुग्नेछन् । अन्तिम समय पाकिस्तानले सहभागी जनाउने भएसँगै प्रतियोगितामा सात टिम रहनेछन् । 

यस पटक महिला टिमको लागि मैत्रीपूर्ण खेल नहुनु दु:खद् पक्ष भएको थापा मान्छन् । ‘पक्कै पनि ठूलो प्रतियोगिताअघि मैत्रीपूर्ण खेल महत्वपूर्ण हुन्छ । तर, हामीसँग यो नै छैन । केही प्रयास भएका पनि थिए, तर सम्भव भएनन्,’ थापाले भने ।   

यसअघि सन् २०१० मा बंगलादेशमा आयोजना भएको प्रतियोगितामा नेपाल भारतसँग १–० अन्तरले फाइनलमा पराजित भएको थियो । दुई वर्षपछि सन् २०१२ मा श्रीलंकामा भएको फाइनल खेलमा नेपाल भारतसँग नै फेरि ३–१ अन्तरले हार्याे । 

यता, सन् २०१४ मा पाकिस्तानमा भएको फाइनलमा पुनः ६–० को हार बहोर्याे ।  सन् २०१६ मा भारतमा भएको प्रतियोगितामा नेपाल भारतसँग सेमिफाइनलमा ३–१ अन्तरले पराजित हुँदै पहिलो पटक फाइनल पुग्नबाट बञ्चित भयो । सन् २०१९ मा विराटनगरमा आयोजना भएको प्रतियोगितामा भने नेपाल भारतसँग पुनः ३–१ अन्तरले पराजित हुँदै घरेलु मैदान उपाधि जित्ने योजना सफल बनाउन सकेन ।