काठमाडौं । वैदेशिक रोजगारीमा जाँदा समस्या परिहाले गुनासो कसलाई सुनाउने भन्ने चिन्तामा हुनुहुन्छ भने अबदेखि तपाईको गुनासो सुन्न श्रममन्त्री आफैँ तयार छन् ।

वैदेशिक रोजगारीका लागि स्वदेशमा होस वा विदेशमा, तपाईंलाइ समस्या परेको छ भने सिधै श्रममन्त्रीलाइ गुनासो सुनाउन सक्नुहुनेछ । त्यसका लागि श्रममन्त्री शेरबहादुर कुँवरले हरेक आइतबार विहान ११ बजेदेखि १२ बजेसम्म तपाईंहरुको गुनासो सुन्ने छन् ।

मन्त्री कुँवरले हिजो आइतबार वैदेशिक रोजगारमा समस्या व्यहोर्नु परेका ९ जनाको गुनासो सुनेर सम्बोधन गरे । विदेश पठाउछु भनेर म्यानपावर व्यवसायीले ठगेका, श्रम स्वकृति विना विदेश गएका, विदेशमा मृत्यु भएका आफन्तको शव नेपाल ल्याउन गाह्रो भएको गुनासो बढी आएको मन्त्री कुवरले जानकारी दिए ।

पीडितहरुको गुनासो सुनेपछि उनीहरुको समस्या समाधान गर्न केही कानूनी अप्ठ्यारो रहेको मन्त्री कुँवरको भनाइ थियो । पीडितहरुको गुनासाको सम्बोधन गर्न सम्बन्धित निकायसँग सहकार्य गरेर मन्त्रालयले काम गर्ने उनको भनाई थियो ।

विदेश पठाउने नाममा दलालहरुबाट ठगिएकाहरुको गुनासो यसअघि पनि सुनिदै आएको भए पनि मन्त्रीले नै सिधै गुनासो सुन्न शुरु गरेको यो पहिलो पटक हो । यसअघि मन्त्रालयको कल सेन्टरमा दैनिक २ सय भन्दा बढी गुनासो आउने गरेको मन्त्रालयको तथ्याङक छ ।