काठमाडौं । भौतिक पूर्वाधार निर्देशनालय प्रदेश–१ इटहरीबाट डिजाइन एन्ड विल्ट (निर्माण व्यवसायी आफैले पुलको डिजाइन गरी निर्माण गर्नुपर्ने) मोडेलका दुईवटा पुल सञ्चालनमा आएको छ । पाँचवटा मध्ये तीनवटा निर्माण क्रममा रहेका छन् ।

यारी खोला पुल (६० मिटर) उदयपुर, गत २०७८ साल पुस २१ गते प्रदेश–१ भौतिक पूर्वाधार विकास मन्त्री हिमाल कार्कीले उद्घाटन गरेपछि सुचारु भएको हो । त्यस्तै गत भदौ ४ गते गिदेरी खोल पुल (७५ मिटर) उदयपुर परराष्ट्रमन्त्री नारायण खड्का र प्रदेश सरकारका सडक पूर्वाधार तथा शहरी विकास मन्त्री हिमाल कार्कीले संयुक्त रुपमा पुलको उद्घाटनसँगै सुचारु भएकाे थियाे ।

यारी खोला पुल आश्रय केएम जय विष्णु जेभीले निर्माण गरेको थियो भने गिदेरी खोला पुल इलाइट सूर्य एन्ड सन्स् जेभी धरानले निर्माण गरेको हो ।

त्यसैगरी तेह्रथुमको छथर गाउँपालिका र पाँचथरको तुम्बेवा गाउँपालिका बीचमा पर्ने तमोर नदीको हाकपराघाट (१५० मिटर), ताप्लेजुङ लिंखिम र खेजेनिम जोड्ने तमोरमा पुल (६० मिटर), सोलुको थुलुङ–दुधकोशी गाउँपालिकाअन्तर्गत दूधकोशी नदीमा (९०मिटर) काे पुल निर्माण कार्य हुँदै गरेको निर्देशनालयका निर्देशक उत्तमनारायण खरेलले जानकारी दिए । भौतिक पूर्वाधार निर्देशनालय प्रदेश–१ अन्तर्गतका अधिकांश पुलहरु दुर्गम क्षेत्रमा निर्माण भइरहेको र कोभिडका बाबजुद पनि २०७८/०७९ मा पुल निर्माणमा उल्लेखनीय प्रगति भएको निर्देशक खरेलले जानकारी दिए ।

निर्माण कार्य सञ्चालनमा रहेका बाँकी पुलहरु पनि छिट्टै सम्पन्न हुने उनले बताए । साथै उदयपुरको मैनामैनी र भोजपुरको हतुवागढी जोड्ने सडकमा पर्ने दूधकोशी नदी, चुहारमा समेत ९० मिटरको स्टिल ट्रष्ट पुल निर्माणाधीन रहेको छ । उक्त पुल कालिका प्यासेफिक जेभीले निर्माण गर्दैछ ।

त्यसैगरी प्रदेश सरकारको गौरवको योजनाको रुपमा रहेको ऐतिहासिक, धार्मिक तथा पर्यटकीय बराह क्षेत्रमा नमूना झोलुङ्गे पुल निर्माणका लागि चालू आर्थिक वर्ष २०७९/०८० मा बजेट विनियोजन भइ हाल डिजाइनको क्रममा रहेको छ । ‘वाइ’ टाइपको हुने उक्त पुल सुनसरी, उदयपुर र धनकुटा जोड्नेछ । यो पुलले तीन जिल्लालाई मात्र जोड्दैन, आन्तरिक धार्मिक पर्यटनलाई समेत टेवा पुग्ने निर्देशक खरेलले बताए ।