जनकपुर । मधेस प्रदेश सरकारका प्रमुख न्यायाधिवक्ता दीपेन्द्र झाले पदबाट राजीनामा दिएका छन् ।

मधेस प्रदेश गठन भएदेखि नै प्रमुख न्यायाधिवक्तामा नियुक्त भएका झाले मुख्यमन्त्री लालबाबु राउतलाई शनिबार राजीनामा बुझाएका छन् । झा शनिबार नै जनता समाजवादी पार्टीमा प्रवेश गर्दैछन् । जसपाका अध्यक्ष उपेन्द्र यादवले झालाई पार्टी प्रवेश गराउने कार्यक्रम छ ।

झाले मुख्यमन्त्री राउतलाई भेटेर राजीनामा दिइसकेको र जसपा प्रवेशको तयारी भइरहेको बताए । झा महोत्तरीको क्षेत्र नम्बर(३ बाट प्रतिनिधिसभा निर्वाचन लड्ने तयारीमा छन् ।

प्रमुख न्यायाधिवक्ता रहँदा झाले संघीय सरकारसित प्रदेशको अधिकार थुत्न निरन्तर कानुनी लडाइँ गरिरहे । उनकै सक्रियतामा सर्वोच्च अदालतमा मधेस सरकारले संघीय सरकारविरुद्ध करिब ८ वटा मुद्दा दर्ता गराएको थियो ।