काठमाडौं । करिब सात महिनादेखि रिक्त रहेका राष्ट्रिय सभाका चारवटा विषयगत समितिले नेतृत्व पाएका छन् ।

सभापतिका लागि भदौ २३ गते बिहीबार निर्वाचन गर्ने तय भएको छ । निर्वाचन कार्यतालिकाअनुसार सभापतिका लागि राष्ट्रियसभाका सचिव राजेन्द्र फुयालको कार्यकक्षमा उम्मेदवारी दर्ता गरिएको छ । चारवटा समितिमा चार प्रमुख दलले एक/एकवटा सभापति लिएर निर्विरोध चयन गर्ने यसअघि समझदारी बनेअनुसार उम्मेदवारी दिइएको हो । यसका लागि बुधबार उम्मेदवारी मनोनयन दर्ताको तालिका थियो । तालिका अनुसार चार सभापतिमा एकरएक जनाको मात्रै उम्मेदवारी परेको छ ।

नेपाली कांग्रेस, नेकपा माओवादी केन्द्र, नेकपा एकीकृत समाजवादी र नेकपा एमालेले १/१ सिटमा भागबण्डा गरेका छन् । दीगो विकास तथा सुशासन समितिमा कांग्रेसका प्रकाश पन्थ सभापति बन्ने भएका छन् । राष्ट्रिय सरोकार तथा समन्वय समितिमा नेकपा एमालेकी दिलकुमारी रावल ‘पार्वती’ निर्विरोध भएकी छन् । माओवादीको भागमा परेको प्रत्यायोजित व्यवस्थापन तथा सरकारी आश्वासन समितिमा मायाप्रसाद शर्मा सभापति बन्ने भएका छन् ।

विधायन व्यवस्थापन समितिमा नेकपा एसका महासचिव डा. बेदुराम भुसाल सर्वसम्मत भएका छन् । बिहीवारका लागि तय भएको निर्वाचनका लागि बुधवार उम्मेदवारी मनोनयनको कार्यसूची थियो ।

३ वटा समितिका सभापति फागुन २१ गतेदेखि रिक्त थिए । राष्ट्रिय सरोका समिति भने साउन १७ गतेदेखि रिक्त थियो । समितिमा पार्वती रावल नै दोहोरिएकी छन् ।

संसदीय समितिका सभापतिले राज्यमन्त्रीसरह सुविधा पाउने गरेका छन् ।