विराटनगर । नेपाली कांग्रेसका सभापति तथा प्रधानमन्त्री शेरबहादुर देउवाले १ नम्बर प्रदेशमा सत्तारुढ गठबन्धनलाई जिताएर नेकपा एमालेका अध्यक्ष केपी शर्मा ओलीलाई जवाफ दिनुपर्ने बताएका छन् ।

शनिबार प्रदेश १ को राजधानी विराटनगरमा आयोजित सत्तारुढ गठबन्धनको चुनावी कार्यक्रमलाई सम्बोधन गर्दै प्रधानमन्त्री देउवाले प्रदेश १ मा गठबन्धनमा आवद्ध दलका उम्मेदवारलाई जिताउन कार्यकर्तालाई आग्रहसमेत गरे । उनले ओलीले गठबन्धन गर्न हुने हामीले किन नहुने भन्दै प्रश्न समेत सोधेका थिए ।

‘एक नम्बर प्रदेशमा गठबन्धनलाई जिताएर ओलीजीलाई जवाफ दिनुपर्छ’ प्रधानमन्त्री देउवाले भने, ‘ओलीजीले पनि गठबन्धन गर्नुभएको छ, उहाँको राप्रपासँग गठबन्धन भएको छ । उहाँले गठबन्धन गर्न हुने हामीले किन नहुने ?’

उनले सत्तारुढ गठबन्धनका दललाई एक अर्का दलको चुनाव चिह्मा मतदान गर्न अफ्ठ्यारो नमान्न पनि आग्रह गरे । लोकतन्त्र र गणतन्त्रलाई स्थायी गराउन सत्तारुढ गठबन्धनले जित्न आवश्यक रहेको प्रधानमन्त्री देउवाले बताए ।