संसदीय दलको नेता बन्न कांग्रेसभित्र को-कसको दौडधुप

संसदीय दलको नेता बन्न कांग्रेसभित्र को-कसको दौडधुप


ग्लोब नेपाल
18.1k
Shares

काठमाडौं । आम निर्वाचनबाट संघीय सदनमा सबैभन्दा ठुलो दल बन्ने देखिएको नेपाली कांग्रेसभित्र भावी सरकारको नेतृत्व आफ्नो दलले पाउने अपेक्षासहित संसदीय दलको को बन्ने भन्ने वहस सुरु भएको छ । गठवन्धन दलको सोमबारको बैठकमा सत्ता घटक दल माओवादी केन्द्र र नेकपा एकीकृत समाजबादीले भावी सरकार नेतृत्व विषयको उठाएसँगै नेपाली कांग्रेसभित्र संसदीय दलको नेताको बहस सुरु भएको हो ।

हिजो मात्र नेपाली कांग्रेसका सभापति एवम प्रधानमन्त्री शेर बहादुर देउवाले आफुलाई बधाइ दिन बालुवाटार पुगेका नेता शंशाक कोइरालासँग आफुलाई संसदीय दलको नेता चुन्न समर्थन गर्न आग्रह गरेका थिए । यो सँगै भावी सरकारको नेतृत्व सम्वन्धमा प्रधानमन्त्री एवम पार्टी सभापतिले राख्दै आएको मौनता तोडिएको छ । भावी सरकारको नेतृत्वका लागि देउवाले संसदीय दलको नेता बन्न गृहकार्य सुरु गरिसकेको सन्देश प्रवाह भएको छ ।

त्यसैगरी सभापति देउवाले यस सम्बन्धमा अर्का नेता शेखर कोइरालासँग पनि भेटवार्ता गरेका छन् । भेटवार्ता पनि संसदीय दलको नेतामा आफुलाई समर्थन गर्न देउवाले आग्रह गरेको खबरहरु आएका छन् ।

त्यसो त प्रधानमन्त्रीमा देउवा इतर पक्ष मानिएका नेता रामचन्द्र पौडेल, गगन थापा आफु संसदीय दलको नेता बन्ने बताउदै आएका छन् । नेता रामचन्द्र पौडेलेले देश र पार्टीका लागि आफ्नो भुमिका आवश्यक रहेको र आफु नै संसदीय दलको नेता बन्ने दावी गर्दै नेताहरुसँग समर्थनको अपिल समेत गरेका छन् ।

यस्तै यता नेता विश्व प्रकाश शर्माले गगन थापालाई संसदीय दलको नेता बनाउन आफु समर्थक भएर उभिने बताएका छन् । आफ्नो दलको मात्र बहुमतको सरकार बनाउन सक्ने अंकगणित नेपाली कांग्रेससँग प्राप्त भएको छैन । निर्वाचन परिणामले संसदको ठूलो दल र सत्ता गठवन्धनको प्रमुख घटक बन्ने भएपछि कांग्रेसले प्रधानमन्त्रीमा दावी स्वभाविक भए पनि संविधानमा संसदीय दलको नेता बन्नै पर्ने बाध्यकारी छैन ।

संविधानको धारा ७६ को २ मा सदनमा कुनै दलको स्पष्ट बहुमत नभएको अवस्थामा दुई वा दुई भन्दा बढीदलको समर्थनमा बहुमत प्राप्त गर्ने ब्यक्ति प्रधानमन्त्री नियुक्त हुन सक्ने ब्यवस्था गरेको छ । तर नेपाली कांग्रेसको विधानले भने पार्टीको संसदीय दलको नेतालाई मात्र प्रधानमन्त्रीको उम्मेद्वारको रुपमा पार्टीले सिफारिस गर्ने ब्यवस्था गरेको छ ।