काठमाडौं । मेलम्चीको पानी तेस्रोपटक राजधानी आएको आठ दिन पूरा भएपनि अझै पूरै पानी राजधानीमा वितरण हुन सकेको छैन ।

मेलम्चीबाट दैनिक तीन करोड ५० लिटर पानी आइरहेको मेलम्ची आयोजनाले जनाएको छ । तर आएको पानी भने वितरण हुन सकेको छैन । मङ्सिर १८ गते मेलम्ची खोलाबाट १७ करोड ५० लाख लिटर पानी राजधानी आएको थियो । यसको छ दिनपछि अर्थात् मङ्सिर २३ गते शुक्रबारदेखि राजधानीका धारामा तेस्रोपटक मेलम्चीको पानी वितरण सुरु भएको थियो ।

छ महिनासम्म बन्द रहेको वितरण सञ्जालमा आएको समस्याका कारण पूरै पानी वितरण गर्न नसकिएको काठमाडौँ उपत्यका खानेपानी लिमिटेड (केयुकेएल) ले जनाएको छ । केयुकेएल आयोजना कार्यान्वयन निर्देशनालयका अनुसार निर्माण गरेको नयाँ वितरण सञ्जालमा नियमित पानी नहाल्दा केही ‘भल्व’ मा ‘सिक्वेन्स’ मिलाउन समय लागेको हो ।

यसका कारण सबै पानी अझै राजधानीमा वितरण हुन सकेको छैन । सत्र करोड ५० लाख लिटर पानी वितरण गर्न अझै केही दिन लाग्ने केयुकेएलका प्रवक्ता प्रकाशकुमार राईले जानकारी दिए ।