बेइजिङ । चीनले अब जनवरी ८ देखि देश प्रवेश गर्ने विदेशी यात्रुहरूलाई क्वारेन्टाइनमा नराख्ने भएको छ । राष्ट्रिय स्वास्थ्य आयोगका अनुसार चीनमा जाने विदेशीले प्रस्थान गरेको ४८ घण्टाभित्र कोभिड परीक्षण गरेको नेगेटिभ रिपोर्ट भने देखाउनुपर्नेछ । 

पछिल्लो प्रावधानले व्यवसाय र अध्ययनदेखि पारिवारिक पुनर्मिलनसम्म सबै कुराको लागि चीन भ्रमण गर्ने विदेशीहरूको लागि भिसा आवेदनहरू सहज बनाउने सरकारले विश्वास गरेको छ ।

आक्रामक कोभिड शून्य प्रतिबन्धहरूको लागि कानुनी औचित्यलाई प्रभावकारी रूपमा हटाउँदै देशले कोभिडको व्यवस्थापनलाई शीर्ष स्तरबाट दोस्रो उच्च तहमा वर्गीकरण गरेको छ । 

भाइरसको फैलावटको अनुगमन गर्न जारी राखिने र कोभिड प्रकोपको विस्तार रोक्न उपयुक्त उपायहरू चालिने पनि राष्ट्रिय स्वास्थ्य आयोगले प्रतिबद्धता जनाएको छ । 

‘हाम्रो प्राथमिकता अब संक्रमण रोकथाम र नियन्त्रणबाट उपचारमा परिवर्तन गर्न आवश्यक छ’ चीनको कोभिड प्रतिक्रियाको निरीक्षण गर्ने वरिष्ठ स्वास्थ्य अधिकारी लियांग वानियानले भने ।

अन्य देशमा कोभिडसम्बन्धी नियमहरू हटाएर कोभिडसँगै बाँच्ने रणनीति लगाउँदा चीनले भने आफ्नो शून्य कोभिड नीतिलाई निरन्तरता दिँदै क्वारेन्टाइन, सामूहिक परीक्षण, लकडाउन जस्ता उपाय अवलम्बन गरेको थियो । 

तर, प्रतिबन्धबारे चौतर्फी आक्रोश बढ्न थालेपछि सरकारले यसै महिनाको सुरुदेखि प्रतिबन्ध हटाएको छ । प्रतिबन्ध हटेसँगै पुनः कोभिड संक्रमण तीब्र गतिमा फैलिन थालेको छ । एकै दिन एउटै सहरमा एक लाखलाई संक्रमण भएका विवरण सार्वजनिक भएका छन् ।