काठमाडौं । नेपाल क्रिकेट सङ्घ क्यानको आयोजना तथा विवादित भारतीय कम्पनी सेभेन थ्री स्पोर्टसको सञ्चालनमा जारी फ्रेन्चाइज क्रिकेट प्रतियोगिता नेपाल टी-२० लिगमा देखिएको विवादबारे गृह मन्त्रालयले चासो दिएको छ ।

९ पुसदेखि त्रिवि मैदानमा सुरु भएको प्रतियोगितामा खुलेआम सट्टेबाजी, सम्भावित म्याच फिक्सिङ र श्रम स्वीकृतिबिना विदेशी खेलाडीलाई खेलाइएकोबारे अनुसन्धान गर्ने गृहमन्त्री रवि लामिछानेले प्रहरी मुख्यालयलाई निर्देशन दिएका छन् ।

गृहमन्त्रीको सचिवालय श्रोतका अनुसार मन्त्री लामिछाने आफैँले प्रतियोगिताबारे सार्वजनिक भइरहेका तथ्यहरूमा चासो राख्दै मङ्गलवार नेपाल प्रहरीको केन्द्रिय अनुसन्धान ब्युरो (सीआईबी) मार्फत अनुसन्धानका लागि निर्देशन दिएका हुन् ।

मन्त्रालयको निर्देशनअनुसार सीआईबीले मंगलबारदेखि नै आफ्नो जिम्मेवारी सुरु गरिसकेको छ । सट्टेबाजी घरहरू सञ्चालन गर्नेसमेतको उद्देश्यबाट स्थापित संस्था सेभेन थ्रीलाई नेपालको प्रतिष्ठित आधिकारिक क्रिकेट प्रतियोगिता सञ्चालनको अधिकार दिने क्यानको निर्णय सुरुदेखि नै विवादमा मुछिएको छ ।

राष्ट्रिय खेलकुद परिषद् (राखेप)को स्वीकृतिविना नै पहिलो दिनदेखि प्रतियोगितामा विदेशी खेलाडी खेलिरहेका छन् । दुई टिममा त विदेशी खेलाडीले कप्तानीसमेत गरेका छन् । उनीहरूको श्रम स्वीकृतिको प्रक्रिया राखेपबाट अगाडि बढेको छैन ।

मङ्गलवार खेलाडीहरूले पारिश्रमिक नपाएको भन्दै खेल खेल्न अस्वीकार गरेका थिए । क्यानले उनीहरूलाई पारिश्रमिकको ग्यारेन्टी गर्ने बताएपछि २ घण्टा ढिला गरी टस भएको थियो । मङ्गलवार नै प्रतियोगिताको एक फ्रेन्चाइज टिम काठमाडौँ नाइट्सका कप्तान ज्ञानेन्द्र मल्लले आफ्नो टिमका एकजना खेलाडीलाई फिक्सिङको प्रस्ताव आएको खुलासा गरेका थिए ।

उनले तत्कालै क्यान र आइसिसीको एन्टी करप्सन युनिटलाई जानकारी गराएको बताएका थिए । प्रतियोगितामा खेलहरुको अवस्था, खेलाडीको शङ्कास्पद गतिविधिलगायतका कारण देखाएर प्रतियोगिताका एकजना टिभी कमेन्टेटर सचिन तिमल्सिनाले पनि जिम्मेवारी छाडेका छन् ।