काठमाडौं । हिम पहिरोमा परेर सगरमाथा आरोहणको क्रममा ३ जना शेर्पाको मृत्यु भएको छ । आज (बुधबार) बिहान खुम्बु आईसफल भत्किएर हिमालमा पहिरो जाँदा क्याम्प १ भन्दा तल हिउँमा पुरिएर खुम्बु पासाङल्हमु गाउँपालिका – ५ का तीन जना शेर्पा आरोहीको मृत्यु भएको प्रहरीले जनाएको छ ।

विश्वको सर्वोच्च शिखर सगरमाथाको ५ हजार ७ सय मिटरको उचाईमा भएको उक्त घटनामा परी मृत्यु हुनेहरुमा तेन्जिङ शेर्पा, लाक्पा रिता शेर्पा र बादुरे शेर्पा रहेका छन् । इमाजिन ट्रेक प्रालिबाट सगरमाथा आरोहणको क्रममा गाइडको रुपमा हिँडेका शेर्पाहरुको मृत्यु भएको हो ।

बिहान एक्कासी आएको पहिरोका कारण मृतकको शव खोचमा पुरिएको छ । सिम्रिक एयरको हेलिकोप्टरले शव निकाल्ने प्रयास गरे पनि सफल नभएको प्रहरीले जनाएको छ । वसन्त ऋतुको आरोहण सिजनको शुरुवातमै सगरमाथामा मानवीय क्षति भएको हो । घटनाको विस्तृत विवरण आउन बाँकी छ ।