काठमाडौं । एसिया कप क्रिकेट प्रतियोगितामा सहभागी हुन पाकिस्तान पुगेका सन्दीप लामिछानेलाई अभिनेता पल शाहले शुभकामना दिएका छन् । सोमबार उनले सामाजिक सञ्जालमार्फत् लामिछानेलाई ‘सुरक्षित हवाइ यात्रा’ र एसिया कप २०२३ मा ‘टिम नेपाललाई भाग्यले साथ दियोस्’ भनेर शुभकामना लेखेका छन् ।

यो समाचार तयार पार्दासम्म उनको शुभकामना ४ हजार ६ सयले प्रतिक्रिया दिएका छन् । ७७ हजारले सांकेतिक प्रतिक्रिया दिएका छन् भने ७४९ जनाले प्रतिक्रिया लेखेका छन् । प्रतिक्रिया सबै सकरात्मक छैनन्, कुनै त आमचाकरी गालीसमेत छ ।

पल शाहले सन्दीप लामिछानेलाई दिएको शुभकामनालाई धेरैले अर्थपूर्ण रुपमा हेरेका छन् । किनभने दुवैमाथि नाबालिका बलात्कार गरेको आरोप लागेको छ । शाहले नाबालिका बलात्कार अभियोगमा जेल सजाय भोगिसकेका छन् ।

यता, सन्दीप लामिछानेको अभियोगमा अदालतले फैसला सुनाएको छैन । उनको मुद्दा अन्तिम सुनुवाइ हुन तयार भएपनि जिल्ला अदालत काठमाडौंका १० न्यायाधीशको इजलासमा घुमिसकेको छ ।

अन्तिम सुनुवाइ पेसीमा चढ्न थालेको ७ महिना पुगे पनि बहस सुन्ने र फैसला सुनाउने आँट न्यायाधीशहरूले गर्न सकेका छैनन् । कतिपय न्यायाधीशले समय हुँदाहुँदै पनि ‘हेर्न नभ्याइने’ भनेका छन् त कतिपयले बहसै सुनिसकेपछि पनि ‘हेर्न नभ्याइने’ भनेर पन्छाएका छन् ।