काठमाडौं । विश्व फुटबलका स्टार खेलाडीहरू क्रिष्टियानो रोनाल्डो र लियोनल मेस्सी यतिबेला सर्वश्रेष्ठ मानिएका युरोपेली लिगहरूमा छैनन् । तर, उनीहरू जहाँ जुन क्लबमा छन्, आ-आफ्नो टोलीका मुख्य आकर्षण छन् ।

रोनाल्डो अहिले साउदी क्लब अल-नासर र मेस्सी अमेरिकी क्लब इन्टर मायामीमा छन् । दुवैको प्रदर्शन ती लिगमा प्रभावशाली छ । पोर्चुगिज फरवार्ड रोनाल्डोले अर्जेन्टिनी मेस्सीबारे एक अन्तर्वार्तामा धेरै कुरा खोलेका छन् ।

रोनाल्डोले आफूलाई मन पराउनेहरूले मेस्सीलाई घृणा गर्न नपर्ने बताएका छन् । रोनाल्डोले भनेका छन्, ‘जसले क्रिष्टियानो रोनाल्डोलाई मन पराउँछन्, उनीहरूले मेस्सीलाई घृणा गर्नु पर्दैन । हामीले फुटबलको इतिहास परिवर्तन गरेका छौँ । हामीलाई संसारभर सम्मान गरिन्छ, यो सबैभन्दा महत्त्वपूर्ण हो ।’

रोनाल्डोले आफू र मेस्सी साथी नभए पनि पेसाका सहकर्मी भएको बताएका छन् । ‘मेस्सीले आफ्नो बाटो बनाइरहेको छ, जसरी मैले आफ्नो बनाइरहेको छु । हामीले युरोप बाहिर खेल्दा पनि राम्रो गरिरहेका छौँ,’ रोनाल्डोले भनेका छन्, ‘हामी साथी होइनौँ । तर, हामी पेसाका सहकर्मी हौँ र हामी एकअर्कालाई सम्मान गर्छौं । हामीले १५ वर्ष एउटै मञ्चमा समय बिताएका हौँ ।’