रौतहट । पूर्वमन्त्री प्रभु साह नेतृत्वको आम जनता पार्टी (आजपा)का एक केन्द्रीय सदस्य नेकपा एमालेमा प्रवेश गरेका छन् । रौतहट गुजरा नगरपालिकाका मेयर प्रत्याशी समेत रहेका शेख एकरामुल पार्टी परित्याग गरी नेकपा एमालेमा प्रवेश गरेका हुन् ।

सोमवार एमाले जिल्ला पार्टी कार्यालय गौरमा एक कार्यक्रमका बिच सेख एकरामुल लाई एमाले केन्द्रीय सदस्यद्धय रेखा झा र अजय गुप्तासहित जिल्ला संयोजक सचिनानन्द साह, मधेस प्रदेश सदस्य हरिवंश मैनालीले संयुक्त रूपमा स्वागत गरे ।

गत स्थानीय तहको निर्वाचनमा गुजरा नगरपालिकाको मेयर पदमा नेपाली कांग्रेसले टिकट नदिएपछि उनी प्रभु साहको पहलमा एमाले पार्टी प्रवेश गरी एमालेको टिकटबाट मेयर पदमा चुनाव लडेका थिए ।

तर प्रभु साहले नयाँ पार्टी बनाएपछि उनलाई सघाएका एकरामुल फेरि आजपामा भविष्य नभएको भन्दै सोमवार एमाले पार्टी प्रवेश गरेका हुन् ।