काठमाडौँ । यूएई त्रिकोणात्मक ट्वान्टी २० सिरिजमा आइतबार हङकङलाई ६ विकेटले पराजित गर्दै फाइनल प्रवेशका लागि बलियो प्रत्याशी बनेको छ । सिरिजमा युएईको यो पहिलो जित हो । यो जितसँगै युएईको दुई खेलबाट दुई अङ्क भएको छ ।

हङकङ अहिलेसम्म जितविहीन रहेको छ । तीन खेल खेलिसकेको हङकङ अङ्कविहीन छ । आयोजक नेपाल भने यसअघि नै लगातार तीन खेल जितेर ६ अङ्कका साथ फाइनल पुगिसकेको छ ।

काठमाडौँको मूलपानी क्रिकेट मैदानमा आइतबार भएको खेलमा जितका लागि १ सय ५० रनको लक्ष्य पाएको युएईले ४ विकेट गुमाएर १८ ओभरमा १ सय ५३ रन बनायो । उसका लागि ओपनर तथा कप्तान मोहम्मद वासिमले सर्वाधिक ४० रन बनाए । वासिमले यसका लागि १७ बलको मात्र उपयोग गरे र चार चौका तथा तीन छक्का प्रहार गरे । त्यस्तै अर्का ओपनर खालि साहले ३७ रन जोडे ।

बलिङतर्फ हङकङका यसिन मुर्तजाले २ विकेट लिएका थिए । निजाकत खान र एसशान खानले समान १–१ विकेट लिएका थिए ।

पहिले ब्याटिङ गरेको हङकङले पाँच विकेटको गुमाएर १ सय ४९ रन बनाएको थियो ।