काठमाडौं । नेपालमा पर्यटक आगमनमा उत्साहजनक वृद्धि भएकाे छ । सन् २०२३ को अक्टोबर महिनामा सबैभन्दा धेरै पर्यटक नेपाल भित्रिएका छन् । अक्टोबरमा एक लाख १७ हजार ३०६ पर्यटक नेपाल आएकाे नेपाल पर्यटन बोर्डले तथ्यांक सार्वजनिक गरेको छ । यो एक महिनामा नेपाल भित्रिएका पर्यटकको इतिहासमै कीर्तिमानी संख्या हो ।

यसअघि सन् २०१९ को अक्टोबरमा एक लाख १३ हजार ८१६ पर्यटक नेपाल आएका थिए ।

अक्टोबर महिनामा गैरआवासीय नेपालीको सम्मेलन नेपालमा भएकाेले पनि पर्यटकको आगमन वृद्धि भएकाे हाे । उनीहरु समेत नेपाल आउँदा पर्यटकका रुपमा गणना हुन्छ ।

अक्टोबरमा सबैभन्दा धेरै भारतबाट पर्यटक आएका छन् । भारतबाट १८ हजार ४८० पर्यटकले नेपाल भ्रमण गरेका छन् ।

भारतपछि सबैभन्दा धेरै अमेरिकाबाट १४ हजार ८७९ पर्यटक नेपाल आएका छन् । यस्तै, तेस्रो मुलुक बेलायत रहेको छ । बेलायतबाट आठ हजार २१७ पर्यटक नेपाल आएका छन् ।

चौथो स्थानमा रहेको चीनबाट ६ हजार ८८० पर्यटक नेपाल आएका छन् ।

अष्ट्रेलियाबाट ६ हजार ७५, जर्मनीबाट पाँच हजार ९१६, फ्रान्सबाट पाँच हजार २७१, बंगलादेशबाट चार हजार २९२, श्रीलंकाबाट दुई हजार ५०७ र इटलीबाट दुई हजार ४६७ पर्यटक नेपाल आएको बोर्डले जनाएको छ ।

सन् २०२३ को १० महिनाको अवधिमा ८ लाख पर्यटक नेपाल भित्रिएका छन् ।

नेपाल पर्यटन बोर्डका अनुसार जनवरीदेखि अक्टोबरको बीचमा ८ लाख ९ हजार ६७८ जना पर्यटक नेपाल आएका छन् ।