इजरायलले उत्तरी गाजाका नागरिकहरूलाई सो क्षेत्र छाड्न हरेक दिन ४ घण्टा युद्ध स्थगित गर्न सहमत भएको अमेरिकाले जनाएको छ ।

अमेरिकी राष्ट्रपति जो बाइडेनले यो कार्यलाई सही दिशामा पाइला चालेको कदम भएको बताउँदै सो क्षेत्रको सहायताका लागि वकालत गरिरहने बताएका छन् ।

यसअघि इजरायली सेनाले गाजाका नागरिकहरूको लागि मानवीय सहायताको लागि रणनीतिक तथा स्थानीय स्तरमा आक्रमण रोकेपनि युद्धविराम भने नभएको स्पष्ट पारेको छ ।

गाजाको इस्लामिक जिहाद समूहले दुई इजरायली बन्धकको भिडियो सार्वजनिक गरेको छ । सो भिडियो एक वृद्ध महिला र युवकको रहेको छ । इजरायलको सेनाले गाजा शहरको केन्द्रमा भारी आक्रमण गरिरहेको बेला हमासले यो भिडियो सार्वजनिक गरेको हो ।

गाजा शहरका दुई ठूला अस्पतालहरू वरिपरि भीषण आक्रमण गरेको समाचार छ र सो क्षेत्रमा हमासका लडाकुहरू रहेको ईजरायले जनाएको छ । ४ हजार ४ सय भन्दा बढी बालबालिका सहित १० हजार ८ सय भन्दा बढी मानिस मारिएका छन् ।

त्यस्तै इजरायलमा सोही अवधिमा मर्नेको संख्या १,४०० भन्दा बढी छ भने २ सय ४० भन्दा बढीलाई बन्धक बनाईएको छ ।