काठमाडौं । एक दिवसीय विश्वकप क्रिकेटको पहिलो सेमिफाइनल खेल आज भारत र न्युजिल्याण्डबिच हुँदैछ । चार वर्ष चार महिना पाँच दिन अघि यिनै दुई टिम एक दिवसीय विश्वकप क्रिकेटको अघिल्लो संस्करणमा सेमिफाइनलमै प्रतिस्पर्धा गरेका थिए, जसमा न्युजिल्याण्डले भारतलाई पराजित गरेको थियो ।

भारतका लागि अघिल्लो विश्वकपमा बेहोरेको हारको बदला लिने अवसरका रुपमा यो म्याचलाई हेरिएको छ भने न्युजिल्याण्डका लागि आइसीसी टुर्नामेन्ट अन्तर्गत नकआउट चरणका म्याचमा भारतमाथिको दबदबालाई निरन्तरता दिने अवसरका रुपमा हेरिएको छ ।

न्युजिल्याण्डसँग भारत सन् २०१९ को विश्वकप सेमिफाइनलमा मात्र होइन, २०२१ मा सम्पन्न आइसीसी वर्ल्ड टेस्ट च्याम्पियनसीपको फाइनलमा पनि पराजित भएको थियो ।

अघिल्लो विश्वकपमा जस्तै यस पटक पनि भारत अंक तालिकाको शीर्ष स्थानमा रहँदै सेमिफाइनलमा पुगेको हो भने न्युजिल्याण्ड चौथो पोजिसनमा रहँदै सेमिफाइनल यात्रा पक्का गरेको हो ।