संयुक्त राज्य अमेरिकाले नागरिक सुरक्षा योजना बिना गाजाको दक्षिणी सहर रफाहमा इजरायलले सुरु गरेको आक्रमणलाई समर्थन नगर्ने बताएको छ । लाखौं शरणार्थीहरुको सुरक्षा योजना बिना हमला गर्दा ठूलो विपद आइपर्ने भन्दै संयमित हुन आग्रह गरेको हो ।

इजरायली प्रधानमन्त्री बेन्जामिन नेतान्याहुले रफाहमा सैन्य कारबाही थाल्न निर्देशन दिएपछि अमेरिकाले कडा चेतावनीस्वरुप यो प्रतिक्रिया दिएको हो । शरणार्थी शिविरमा गरिने सैन्य कारबाहीले निर्दोश नागरिकको हताहति हुने भन्दै सर्वसाधारणको सुरक्षा योजना मुख्य भएको अमेरिकी राष्ट्रिय सुरक्षा परिषद्का प्रवक्ता जोन किर्बीले बताउनुभएको छ ।

गाजामा सञ्चालित राष्ट्र संघीय सहायता निकाय, UNRWA का प्रमुखले उत्तरी गाजामा तीन लाख शरणार्थी भोकमरीको जोखिममा रहेको जनाएका छन् । इजरायलले वर्षको सुरुदेखि नै त्यहाँको सहायता अभियान अवरुद्ध गरेको छ ।

गाजाको स्वास्थ्य मन्त्रालयका अनुसार विगत २४ घण्टामा इजरायली सेनाले गरेको कारबाहीमा १३० जनाको मृत्यु भएको छ भने १७० जना घाइते भएका छन् ।

गत अक्टोबर ७ यता गाजामा इजरायली हमलामा करिव २८ हजार जनाको मृत्यु भएको छ भने ६७ हजारभन्दा बढी घाइते भएका छन् । लडाकु समूह हमासको आक्रमणबाट इजरायलमा ११ सय ३९ जनाको मृत्यु भएको थियो ।