म्युनिख । फ्रान्स क्लब पेरिस सेन्ट जर्मनी (पीएसजी) र जर्मनी क्लब बार्यर म्युनिख च्याम्पियन्स लिगको क्वाटरफाइनलमा पुगेका छन् ।गएराती सम्पन्न राउण्ड १६ को दोस्रो लिगमा लाजियोलाई ३-० गोल अन्तरले पराजित गर्दै समग्रमा ३-१ को नतिजासहित बायर्न म्युनिख क्वाटरफाइनलमा पुगेको हो ।

बायर्न म्युनिखको जितमा ह्यारी केनले २ तथा थोमस मुलरले एक गोल गरेका थिए । यसअघि पहिलो लिगमा लाजियोले बायर्नलाई १-० गोलले पराजित गरेको थियो । त्यस्तै पिएसजीले पनि रियल सोसियडाडमाथि समग्रमा ४-१ को नतिजासहित क्वाटरफाइनलमा आफ्नो स्थान सुरक्षित गरेको छ ।

पिएसजी च्याम्पियन्स लिगको क्वाटरफाइनलमा

पिएसजी युइएफए च्याम्पियन्स लिगको क्वाटरफाइनलमा पुगेको छ। च्याम्पियन्स लिगको राउण्ड १६ अन्तर्गतको दोस्रो लिगमा रियल सोसियडाडलाई २-१ गोल अन्तरले पराजित गर्दै समग्रमा ४-१ को नतिजा सहित पिएसजी क्वाटरफाइनलमा पुगेको हो।

पिएसजीको जितमा किलियन एम्बाप्पेले दुवै गोल गरेका थिए। उनले खेलको १६औं र ५६औं मिनेटमा गोल गरेका थिए। त्यस्तै रियल सोसियडाडका लागि एक गोल मिकेल मेरिनोले गरेका थिए। यसअघि पहिलो लिगमा पिएसजीले २-० को जित निकालेको थियो।