किङ्गसटाउन (वेष्ट इण्डिज) । नेपाल क्रिकेटका डाई हार्ट फ्यानहरू मधुकर राजभण्डारी र विजयमान श्रेष्ठ (छोरा सबिस श्रेष्ठ सहित) नेपाली क्रिकेट टिमको हौसला बढाउन नेपालबाट अमेरिका हुँदै वेष्ट इण्डिजसम्म पुगेका छन् ।

काठमाडौंबाटै नेपाली टोलीको जर्सी लगाएर अमेरिका र वेष्ट इण्डिज पुगेका उनीहरू टि—ट्वान्टी विश्वकप अन्तर्गत नेपालका सबै खेल हेर्न झण्डा र ढाका टोपी सहित स्टेडियममा उपस्थित भए ।

आज बंगलादेश विरुद्धको खेल हुँदै गर्दा किङ्गसटाउन स्टेडियममा उपस्थित सेन्ट भिनसेन्ट एण्ड द ग्रिनाडिनेसका प्रधानमन्त्री राल्फ गोन्साल्भेसलाई उनीहरूले नेपाली टोपी लगाइदिँदै काँधमा राष्ट्रिय झण्डा समेत ओडाइदिए ।

क्रिकेटप्रेमी मधुकर राजभण्डारीका अनुसार नेपाली क्रिकेटका जर्बजस्त फ्यानहरू देखेर प्रधानमन्त्री गोन्साल्भेस चकित परेका छन् । प्रधानमन्त्री गोन्साल्भेसले नेपाल यस पटक लिग चरणबाटै बाहिरिएपनि नेपाली टिमको भविष्य उज्वल रहेको बताएका छन् ।