काठमाडौँ । टी-२० विश्वकप क्रिकेटमा सहभागी नेपाली राष्ट्रिय क्रिकेट टोली आज स्वदेश फर्केकाे छ । टिम दुई वटा समूह बनाएर नेपाल फर्किएको हो ।

एउटा समूह गएराति १ बजे र अर्को समूह आज बिहान १० बजे स्वदेश आइपुगेको हो । कुशल भुर्तेल, सोमपाल कामी, आसिफ शेख, करन केसी र अविनाश बोहरालगायतको समूह हिजो राति १ बजे विमानस्थलमा ओर्लिएका थिए । कप्तान रोहित कुमार पौडेल लगायत बाँकी रहेका खेलाडी तथा अफिसियल आज आएका हुन् ।

स्पीनर सन्दीप लामिछाने भने आइपुगेका छैनन् । सन्दीपसँग अमेरिकाको भिसा नभएकाले उनी क्यानडाबाट दुई दिनपछि आइपुग्ने बताइएको छ । यस्तै प्रशिक्षक मोन्टी देशाईँ पनि आएका छैनन् ।

विश्वकपमा नेपालले तीन खेलमा हार बेहोरेको थियो भने श्रीलंकासँगको खेल वर्षाका कारण प्रभावित हुँदा दुवै टोलीले अङ्क बाँडेका थिए ।

दक्षिण अफ्रिकाविरुद्ध नेपालले बेहोरेको एक रनको हार भने चर्चाको विषय बनेको थियो । नेपाल आफ्नो इतिहासमै दोस्रो पटक टी-२० विश्वकपमा सहभागी बनेको थियो ।