सिन्धुली । मध्य पहाडी लोकमार्गअन्तर्गत सिन्धुलीको गोलान्जोर गाउँपालिका- १ कुडेलेबाट सुनकोशी नदीमा गाडी खसेको छ ।

पूर्वबाट काठमाण्डु आउँदै गरेको नम्बर नखुलेको डबल क्याप बलेरो गाडी शनिबार सांझ सवा ६ बजेतिर सुनकोशी नदीमा खसेर बेपत्ता भएको हो ।

सशस्त्र प्रहरी बलका सहायक प्रवक्ता डिएसपी शैलेन्द्र थापाले विपद व्यवस्थापन बेश खुर्कोटबाट सशस्त्र प्रहरी निरीक्षकको नेतृत्वमा गएको गोताखोरसहित १० जनाको टोलीले गाडीको खोजी गरिरहेको बताए । गाडीमा सवार ४ मध्ये ३ जना नदीमा बेपत्ता भएका छन् ।

बेपत्ता हुनेमा भक्तपुरको सूर्यविनायक नगरपालिका जगाती बस्ने ३२ वर्षीय चालक अबिन बाके, सोही ठाउँका ३० वर्षीय प्रनित स्यागु र ३७ वर्षीय बलराम घटुवा छन् । गाडीमा सवार सुशान्त कक्षपतिले हामफेर ज्यान बचाएका छन् । सामान्य घाइते भएका उनको खुर्कोट अस्पतालमा उपचार भइरहेको छ ।