काठमाडौं । साविक विजेता बंलादेश साफ महिला च्याम्पियनसिपको फाइनलमा प्रवेश गरेको छ ।

दशरथ रंगशालामा आइतबार भएको सेमिफाइनल खेलमा बंगलादेशले भुटानलाई ७–१ गोलले हरायो । बंगलादेशको जितमा तोहुरा खातुनले ह्याट्रिक गरिन् ।

कप्तान सविना खातुनले दुई तथा रितु चक्मा र सेउली अजिमले एक गोल गरिन् । भुटानका लागि डेकि ल्हाजोमले सान्त्वना गोल फर्काइन् ।

बंगलादेश समूह ‘ए’ को विजेताको रुपमा सेमिफाइनलमा पुगेको थियो । भुटान समूह ‘बी’ को उपविजेताको रुपमा सेमिफाइनलमा पुगेको थियो । फाइनलमा बंगलादेशले नेपाल र भारतबिचको विजेतासँग प्रतिस्पर्धा गर्नेछ ।

नेपाल र भारतको सेमिफाइनल खेल आजै साँझ ६:३० बजे हुनेछ । नेपाल समूह ‘बी’ को विजेता र भारत ‘ए’ को उपविजेता बन्दै सेमिफाइनलमा प्रवेश गरेको हो ।