वासिङ्टन डीसी । अमेरिका र चीनले तीन/तीन जना कैदी साटेका छन् । अमेरिकामा रहेका तीन चिनियाँ कैदीलाई रिहा गरेबापत चीनले पनि आफ्नो कैदमा रहेका तीन अमेरिकी कैदीलाई छाडिदिएको छ । कैदी आदान प्रदान गर्न राष्ट्रपति जो बाइडेनको प्रशासनले वार्ता थालेपछि यो कदम चालिएको बताइएको छ ।

मार्क स्वीदान, काई लि र जोन लेउङ अमेरिका फर्किने क्रममा रहेको नेशनल सेक्युरिटी काउन्सिलका एक प्रवक्ताले बुधवार एउटा विज्ञप्तिमा भनेका छन् । कयौँ वर्षमा उनीहरू छिट्टै फर्किने अनि परिवारसँग मेलमिलाप हुने विज्ञप्तिमा भनिएको छ ।

यस्तो खालको कैदी आदान प्रदान भएको यो कयौँ महिनापछि पहिलो पटक हो । बुधवार नै चिनियाँ अधिकारीहरूले पनि अमेरिकाको कैदमा रहेका तीन चिनियाँ नागरिक रिहा भएको पुष्टि गरेको छ । चीन सरकारको अथक प्रयासपछि अमेरिकाले गलत तरिकाले समातेर राखेको तीन जना चिनियाँ नागरिकलाई रिहा भएको चिनियाँ विदेश मन्त्रालयका प्रवक्ता माओ निङ्गले बुधवार एउटा विज्ञप्तिमा भनेका थिए ।

यही महिनाको सुरुमा पेरुमा आयोजित एपेकको शिखर सम्मेलनमा बाइडेनले चिनियाँ राष्ट्रपति सि चिनफिङसँग गलत तवरले थुनामा राखिएका आफ्ना नागरिकको रिहाइको विषय उठाएका थिए ।