काठमाडौं । स्वास्थ्य तथा जनसंख्यामन्त्री प्रदीप पौडेलले नेपालमा एमपक्स सङ्क्रमण भित्रिन नदिन भइरहेका प्रयासबारे त्रिभुवन अन्तर्राष्ट्रिय विमानस्थलको स्थलगत निरीक्षण गरेका छन् ।

मन्त्री पाैडेलले विमानस्थलमै सम्बन्धित निकायका पदाधिकारीको बैठक डाकेर जोखिम फैलन नदिन प्रभावकारी सेवा दिन निर्देशनसमेत दिए । अहिले स्वास्थ्य मन्त्रालयले एमपक्स फैलिन नदिन विमानस्थल हुँदै स्वदेश आउने यात्रुका लागि हेल्थ डेस्कमार्फत निगरानी र सचेतनामूलक जानकारी दिँदै आइरहेको छ ।

मन्त्री पौडेलले विमानस्थलमा एअरलायन्स, नागरिक उड्डयन अधिकारी, अद्यागमनका कर्मचारी तथा सुरक्षाकर्मीसहित अधिकारीहरूलाई नागरिकमाझ थप जोखिम फैलिन नदिन मन्त्रालय प्रतिबद्ध रहेको बताए ।

साउदी अरेबियाबाट आएका दुई जनामा सङ्क्रमण देखिएकामा एक जना उपचारपछि घर फर्किसकेका छन् । अर्का एक जनाको सुरक्षित अवस्थामा सरुवा रोग नियन्त्रण अस्पतालमा उपचार भइरहेको छ ।