काठमाडौं । जय ट्रफी एलिट कप क्रिकेटमा अहिले दोस्रो दिनको खेल भइरहेको छ । पर्साको वीरगञ्जमा नेपाल पुलिस क्लब र त्रिभुवन आर्मी क्लब तथा धनुषाको जनकपुरमा बाग्मती प्रदेश र मधेश प्रदेशबीच दोस्रो दिनको खेल जारी छ ।

७ विकेट गुमाएर १ सय ३ रनको अवस्थाबाट आजको ब्याटिङ थालेको पुलिस पहिलो पारीमा १ सय २५ रनमा अलआउट भएको छ । अहिले आर्मीले दोस्रो पारीको ब्याटिङ गरिरहँदा याे समाचार तयार पार्दासम्म ४ विकेट गुमाएर ७२ रन बनाएकाे छ । आर्मीले ६८ रनकाे अग्रता लिएकाे छ । यसअघि आर्मी पहिलो पारीमा हिजो १ सय २१ रनमा अलआउट भएको थियो ।

यस्तै २ विकेट गुमाएर ३४ रनको अवस्थाबाट आजको ब्याटिङ थालेको बाग्मती पहिलो पारीमा १ सय ५० रनमा अलआउट भएको छ । अहिले मधेशले दोस्रो पारीको ब्याटिङ गरिरहँदा याे समाचार तयार पार्दासम्म एक विकेट पनि नगुमाई १७ रन बनाएकाे छ । मधेश अझै ३१ रनले पछि छ । यसअघि मधेश पहिलो पारीमा १ सय २ रनमा अलआउट भएको थियो ।

दुई दिवसीय फर्म्याटमा हुने जय ट्रफीमा चार वटा टोलीको सहभागिता छ । हिजोदेखि शुरू भएको प्रतियोगितामा लिग चरणका खेल सिङ्गल राउन्ड रोबिनका आधारमा हुनेछ । लिग चरणका शीर्ष दुई टोली फाइनलमा पुग्नेछन् । फाइनल खेल तीन दिवसीय फर्म्याटमा हुनेछ ।