काठमाडौं । दुई कम्युनिस्ट दल नेकपा (एमाले)काे केन्द्रीय कमिटी र नेकपा (माओवादी केन्द्र) को केन्द्रीय समिति बैठक सोमबार पनि जारी छ ।

ललितपुर, च्यासलस्थित एमाले केन्द्रीय कार्यालयमा साे पार्टीकाे केन्द्रीय कमिटी बैठक केहीबेर अघिबाट सुरु भएको प्रधानमन्त्रीको सचिवालयले जनाएको छ ।

बैठकमा केन्द्रीय सदस्यहरुले राजनीतिक र सांगठनिक प्रतिवेदनमाथि आ–आफ्नो धारणा राखिरहेकाे एमाले केन्द्रीय प्रचार विभाग प्रमुख राजेन्द्र गौतमले जानकारी दिए । त्यसपछि केन्द्रीय सदस्यको रायसहितको निष्कर्ष प्रस्तुत हुने कार्यसूची छ ।

आइतबार प्रधानमन्त्री एवम् पार्टी अध्यक्ष केपी शर्मा ओलीले राजनीतिक र महासचिव शंकर पोखरेलले साङ्गठनिक प्रतिवेदन पेस गर्नुभएको थियो । प्रतिवेदनमाथि आइतबार २७ जना केन्द्रीय सदस्यले आ–आफ्नो धारणा राखेका थिए ।

यता माओवादी केन्द्रको केन्द्रीय समिति बैठकमा अध्यक्ष प्रचण्डको राजनीतिक प्रस्तावमा छलफल जारी छ ।

छलफलका लागि केन्द्रीय सदस्यहरुलाई तीन–तीन मिनेटको समय छुट्याइएको छ । छलफलमा भाग लिन इच्छुक केन्द्रीय सदस्यहरुलाई नाम टिपाउँदै बोल्न दिइएको छ ।

विगतका बैठकहरुमा राजनीतिक प्रतिवेदनमा छलफल गर्न समूह बनाउने र छलफलपछि समूहको नेताले धारणा सुनाउने गरिन्थ्यो । तर यसपटक त्यस्तो अभ्यास नगरी केन्द्रीय सदस्यहरुलाई सीधै बोल्न दिइएको छ ।