विराटनगर । मोरङको सुन्दरहरैचा र बेलबारीमा भएका छुट्टाछुट्टै सवारी दुर्घटनामा २ जनाको मृत्यु भएको छ ।

पूर्वपश्चिम राजमार्गअन्तर्गत सुन्दरहरैचा नगरपालिका–९ नागदेवीमा प्र१–०२–०४९प३७१८ नम्बरको मोटरसाइकल र प्र १–०२९०५१ प ७६३५ नम्बरको स्कुटर आपसमा ठोक्किएर दुर्घटना भएको हो । दुर्घटनामा स्कुटर चालक सुन्दरहरैचा–९ की ३८ वर्षीया प्रमिला श्रेष्ठको मृत्यु भएको प्रहरीले जनाएको छ ।

दुर्घटनामा गम्भीर घाइते उनलाई उपचारका लागि विराट नर्सिङहोममा भर्ना गरिएकामा उपचारका क्रममा मृत्यु भएको हो । मोटरसाइकल चालक सुनसरीको इटहरी उपमहानगरपालिकाका ४० वर्षीय नवीनसिंह ठकुरी घाइते भएका छन् ।

यस्तै बेलबारी नगरपालिका–१० चाँदनी चोकमा बेलबारी नगरपालिका १०४–२०८१–८२ नम्बरको सिटी सफारी दुर्घटना हुँदा ५० वर्षीया मायादेवी राजवंशीको मृत्यु भएको छ । उनको पनि विराट मेडिकल कलेजमा उपचारका क्रममा मृत्यु भएको मोरङ प्रहरी प्रमुख एसपी नारायण चिमौरियाले जानकारी दिए ।