काठमाडौं । जय ट्रफी एलिट कप प्रतियोगिताको उपाधि नेपाल पुलिस क्लबले जितेको छ । फाइनलमा त्रिभुवन आर्मी क्लबलाई २८ रनले हराउँदै पुलिस विजेता बनेको हो ।

पुलिसलाई जिताउन स्पिनरहरु सागर ढकाल र ललित राजवंशीले उत्कृष्ट बलिङ गरे । सागरले ६ र ललितले ४ विकेट लिए ।

बिहीबार पर्साको विरगञ्जस्थित नारायणी क्रिकेट मैदानमा आर्मीले जितका लागि १०३ रनको लक्ष्य पाएको थियो ।

आर्मी २९.२ ओभरमा ७४ रन मात्रै जोडेर अलआउट भयो । चौथो इनिङमा आर्मीका कुनै पनि ब्याटर विकेटमा जम्न सकेनन् । ओपनर इमरान सेखले सर्वाधिक २८ रन बनाए । कप्तान विनोद भण्डारी र सोमपाल कामी समान ११-११ रन बनाए । अन्य ब्याटरले दोहोरो अंकमा रन बनाउन सकेनन् ।

पुलिसका कप्तान आरिफ शेखले सुरूदेखि अन्तिमसम्म सागर र ललितलाई मात्रै बलिङ गराए ।

लगातार १५ ओभर बलिङ गरेका ललितले ३९ रन खर्चिएर ४ विकेट र सागरले १४.२ ओभरमा ३५ रन खर्चेर ६ विकेट लिए । सागरले पहिलो इनिङमा पनि ५ विकेट लिएका थिए ।

दोस्रो इनिङमा पुलिसका ओपनर कुशल भुर्तेलले सर्वाधिक ४५ रन बनाएका थिए । दीलिप नाथले ३४ रन जोड्दा राशिद खानले १८ र अमित श्रेष्ठले १३ रन थपे ।

दोस्रो इनिङमा बलिङतर्फ आर्मीका साहब आलम र बसिर अहमेदले समान पाँच विकेट लिएका थिए । साहब आलमले २५ ओभर बलिङ गर्दा चार मेडन फ्याक्दै ७५ रन खर्चिएका थिए । यस्तै, बसिरले २२.१ ओभरमा ६ मेडन फ्याक्दै ४९ रन खर्चिएका थिए ।