बिराटनगर । नेपाली कांग्रेसका कोशी प्रदेश समिति सभापति उद्धव थापामाथि कुटपिट भएको छ । झापाको सुरुङ्गाबाट बिर्तामोड फर्कने क्रममा उनीमाथि कुटपिट भएको हो । उनी कोशी प्रदेशको पूर्वमुख्यमन्त्री समेत हुन् ।

नेपाल प्रेस युनियन झापाले दोमुखामा आयोजना गरेको वार्षिक साधारणसभाबाट फर्कंदै गर्दा शनिबार बेलुका करिब ७ बजे कनकाई नगरपालिकाको जुकेखाडीनजिक कुटपिट हुँदा थापाको आँखामा चोट लागेको छ ।

थापासँगै गाडीमा सवार कांग्रेस झापाका सचिव कृष्ण हुमागाईंले ले घटनाको पुष्टि गरेका छन् । उनले भने, “गाडी ओभरटेक गर्ने क्रममा एक्कासि विवाद गरी एक युवाले हातपात गरेका हुन् ।”

बा१झ ६५३ नम्बरको गाडीमा आउँदै गरेका थापामाथि बा१ञ १८७० मा सवार व्यक्तिले आक्रमण गरेका थिए । साँघुरो बाटोमा गाडी ‘ओभरटेक’ गर्न खोजेपछि थापाको सुरक्षामा खटिएका सुरक्षाकर्मीले ‘भीआईपी’ भनेर जानकारी गराउँदै गर्दा एक युवकले मुक्का प्रहार गरेका थिए । थापा बिर्तासिटी अस्पतालमा भर्ना भएका छन् ।

नेपाल विद्युत् प्राधिकरण सुरुंगाका कर्मचारी सवार गाडीलाई थापा चढेको गाडीले ओभरटेक गर्ने क्रममा विवाद भएको थियो । कुटपिटमा संलग्न दुईजनालाई पक्राउ गरिएको बिर्तामोड प्रहरीले जनाएको छ । पक्राउ पर्नेमा शिवसताक्षी नगरपालिका–११ का ४९ वर्षीय भक्तबहादुर कटवाल र कनकाई–३ का ४२ वर्षीय पृथ्वी श्रेष्ठ छन् ।