काठमाडौं । मधेश प्रदेशलाई ७ विकेटले हराउँदै बागमती प्रदेश प्रधानमन्त्री कप महिला टी–२० राष्ट्रिय क्रिकेट प्रतियोगिताको ‘सुपर–फोर’ मा पुगेकाे छ ।

मधेशले दिएको ४१ रनको लक्ष्य बागमतीले ८० बलअघि नै ३ विकेट गुमाएर भेटायो । बागमतीकी यशु पाण्डेले १९ रन बनाइन् । मधेशकी रोजु कडरियाले २ विकेट लिइन् ।

यसअघि धनगढीकाे फाप्ला अन्तर्राष्ट्रिय क्रिकेट मैदानमा टस हारेर ब्याटिङको निम्तो पाएको मधेश १५ ओभर ५ बलमा ४० रनमा अलआउट भयो । मधेशका कुनै पनि खेलाडीले दोहोरो अंकमा रन बनाउन सकेनन् । बागमतीकी कञ्चन श्रेष्ठले ४ विकेट लिइन् ।

योसँगै ‘सुपर–फोर’ समीकरण पूरा भएको छ । समूह ‘बी’ बाट त्रिभुवन आर्मी क्लब पनि ‘सुपर–फाेर’ मा पुगेकाे छ । समूह ‘ए’ बाट सशस्त्र प्रहरी बलको एपीएफ क्लब र सुदूरपश्चिम प्रदेश ‘सुपर–फोर’ मा पुगेका छन् ।

‘सुपर–फोर’ मा एक समूहको टोलीले अर्काे समूहको टोलीसँग खेल्नेछन् । ‘सुपर–फोर’ मा शीर्ष दुईमा रहने टोलीबीच उपाधिका लागि प्रतिस्पर्धा हुनेछ । फाइनल खेल आउँदो शनिवार हुनेछ ।