काठमाडौं । नेपाली राष्ट्रिय महिला क्रिकेट टोलीले घरेलु मैदानमा खेल्ने त्रिदेशीय टी–ट्वान्टी अन्तर्राष्ट्रिय क्रिकेट शृङ्खलाको खेल तालिका परिवर्तन भएको छ ।

नेपाल क्रिकेट सङ्घ (क्यान) ले आज विज्ञप्ति निकालेर खेल तालिका परिवर्तन भएको जानकारी गराएको हो । नेपाल, नेदरल्यान्ड्स र थाइल्यान्ड सम्मिलित त्रिदेशीय टी–२० शृङ्खला माघ १७ देखि २५ गतेसम्म नै हुनेछ । तर खेल हुने दिन भने परिवर्तन भएको छ । उद्घाटन खेलमा नेपालले नेदरल्यान्ड्ससँग खेल्नेछ ।

यस्तै माघ १८ गते नेदरल्यान्ड्स र थाइल्यान्ड, माघ १९ गते नेपाल र थाइल्यान्ड, माघ २० गते नेदरल्यान्ड्स र नेपाल, माघ २१ गते थाइल्यान्ड र नेदरल्यान्ड्स, माघ २२ गते थाइल्यान्ड र नेपालबीच खेल हुनेछ ।

यस्तै माघ २३ गते नेपाल र नेदरल्यान्ड्स, माघ २४ गते नेदरल्यान्ड्स र थाइल्यान्ड तथा माघ २५ गते नेपाल र थाइल्यान्ड खेल्नेछन् । लिग चरणको अंक तालिकामा शीर्ष स्थानमा रहने टोली विजेता बन्नेछ । प्रतियोगिताका सबै खेल कीर्तिपुरको त्रिवि अन्तर्राष्ट्रिय क्रिकेट मैदानमा हुनेछ ।