पोखरा । नेपाली कांग्रेसका सभापति शेरबहादुर देउवाले पार्टीका सबै नेताबीच एकता हुनुपर्ने तथा पार्टी एकढिक्का भएर यही निर्वाचन प्रणालीमा पनि बहुमत ल्याउन सकिने बताएका छन् ।

पोखरामा पार्टीले आयोजना गरेको प्रदेश सभापति तथा प्रदेश प्रशिक्षण विभागका प्रमुखहरूका लागि पोखरामा आयोजित ‘संगठन र समसामयिक सन्दर्भमा अभिमुखीकरण’ कार्यक्रम उद्घाटन गर्दै देउवाले सहज नभए पनि असम्भव नभएको बताए ।

‘यो संविधानअनुसार बहुमत प्राप्त गर्न सहज छैन । तै पनि पार्टी एक भएर हिँडे, मतभेद बिर्सिएर हिँडे बहुमत ल्याउन सकिन्छ,’ पार्टीभित्र क्रियाशील विभिन्न समूहहरूतर्फ संकेत गर्दै सभापति देउवाले भने, ‘पार्टीका सबै नेताहरू लागेर पार्टीलाई त्यही दिशामा अगाडि बढाउन हार्दिक अनुरोध गर्दछु ।’

उनले आफ्ना मतभेदहरू बिर्सिएर पार्टीमा एकता स्थापित गर्न सबै नेताहरू लागे पार्टीलाई बहुमत दिलाउन सकिने बताए ।

बिपी कोइराला, गणेशमानसिंह श्रेष्ठ, कृष्णप्रसाद भट्टराई, गिरिजाप्रसाद कोइरालाजस्ता नेताले सुम्पिएको जिम्मेवारी अहिलेको नेतृत्वको काधमा आएको भन्दै देउवाले त्यो जिम्मेवारी पूरा गर्नका लागि पनि पार्टीभित्र एकता जरुरी रहेको बताए ।

‘देशको संविधान, देशको राजनीति समावेशी समानुपातिक व्यवस्थामा आधारित छ । सबैको प्रतिनिधित्व संविधानले गरेको छ । यो व्यवस्था हामीले लडेर ल्याएको हो । तर, आउँदा दिन चुनौतिपूर्ण छन् । संघीय प्रणाली, समावेशी व्यवस्था सदृढ गर्न पनि पार्टीभित्र एकता चाहिएको छ,’ देउवाले भने ।