प्युठान । नेपाली कांग्रेसका महामन्त्री गगन थापाले वर्तमान सत्ता गठबन्धन पूरा कार्यकाल टिक्ने दाबी गरेका छन् । प्युठानमा सोमबार आयोजित पार्टीको आमसभालाई सम्बोधन गर्दै उनले कांग्रेसले एमालेसँग गरेको समझदारी अनुसार सरकार २०८४ सालसम्म सञ्चालन हुने स्पष्ट पारे ।

‘अबको तीन वर्ष सरकार स्थिर रूपमा सञ्चालन गर्छौं । कुनै चकचक गर्दैनौं, उपद्रो गर्दैनौँ । कांग्रेस सत्ता र सरकारका लागि बेइमानी गर्दैन,’ उनले भने । महामन्त्री थापाले सरकार विधि र कानुनअनुसार सञ्चालन हुने बताउँदै भन्नुभयो, ‘यदि सम्झौता गर्नैपर्ने अवस्था आयो भने कांग्रेस सरकार छोड्न तयार छ । प्रजातान्त्रिक अधिकारमाथि कुनै सम्झौता हुँदैन ।’

उनले कांग्रेस र नेकपा एमालेबिचको सम्बन्ध बराबरीको हुने बताउँदै भने, ‘हामी न त एमालेलाई हेप्छौं, न त आफू हेपिन तयार छौं । केन्द्रदेखि जिल्ला तहसम्म समान व्यवहार हुनुपर्छ । कुनै दुर्व्यवहार भए सहेर बस्दैनौँ । हामी अबको ३६ महिना विधि, शासन र परिणाममुखी सरकार सञ्चालन गर्न चाहन्छौं । यो समयको अधिकतम उपयोग गर्ने लक्ष्य छ ।’

बिगतका दशकहरू शान्ति प्रक्रिया र संविधान कार्यान्वयनमा बितेको उल्लेख गर्दै महामन्त्री थापाले २०८० देखि २०९० लाई विकास र निर्माणको दशक बनाउने प्रतिबद्धता व्यक्त गरे ।

‘यो दशक रोजगारी सिर्जना, नेपाली आमाबुवालाई खुसी दिने, गरिबी र बेरोजगारी घटाउने दशकको रूपमा स्थापित गर्नुपर्छ । कांग्रेससँग योजना, भिजन, र सङ्कल्प छ,’ उनले भने । यस्तै महामन्त्री थापाले पार्टीको १५औँ महाधिवेशन र २०८४ को निर्वाचनका सन्दर्भमा आवश्यक छलफलको समय नआइसकेको पनि स्पष्ट पारे ।