काठमाडौं । राष्ट्रियसभाका सांसद जगप्रसाद शर्माले पूर्वराजा ज्ञानेन्द्र शाहलाई फर्काउने नाममा भइरहेको प्रदर्शनलाई नियन्त्रण गर्न सरकारसँग माग गरेका छन् । नेकपा (माओवादी केन्द्र)का सांसद शर्माले राजाको वंश विनाश गरेकाहरूले नै नाटक मञ्चन गरिरहेको आरोप लगाए ।

“अहिले तथाकथित प्रतिगामी शक्तिहरू राजा फर्काउने, जसले राजाको वंश विनाश गरेका हुन् । तिनैले राजा फर्काउने नाटक मञ्चन गरिराखेका छन्,” उनले भने । “संविधान र व्यवस्थाविरुद्धको हर्कतलाई सरकारले नियन्त्रण गर्न नसकेको हाे ? यो अराजकतालाई नियन्त्रण गर्न सरकार किन सकिरहेको छैन ? प्रतिपक्षको कुरा किन सुनिरहेको छैन ? देशमा बढिरहेको अराजकता, संविधानविरुद्धको हर्कत सरकारले तुरुन्त नियन्त्रण गरोस् ।”

शर्माले विद्यमान राजनीतिक दलहरूले नै कित्ता स्पष्ट गर्नुपर्ने आवश्कता औँल्याए । उनले दलहरूको समेत ‘अप्रत्यक्ष गठबन्धन त छैन’ भनेर शंका गरे । गणतन्त्रको विकल्प राजतन्त्र हुन नसक्ने उनको भनाइ छ ।